Яшавну оьсювю- аслу мурат
Россияны Президенти Владимир Путин бугюнлерде РФ-ни Халкъ Жыйынына йиберген Чакъырыв кагъызында уьлкебизни гележегин гёз алгъа тутуп яшавлукъ-экономика масалаланы ёрукълашдырывгъа айрыча агьамият берилегени англашыла. Озокъда, гючлю ва хайырлы экономика болмаса пачалыкъда гьар тюрлю тармакъларда тувулунагъан агьамиятлы масалаланы уьстюнлю кюйде яшавгъа чыгъармагъа четим болагъаны да гьакъ. Муна шо саялы да, Чакъырыв кагъызда экономиканы беклешдиривню кюрчюсюнде яшавлукъ масалаланы ёрукълашдырыв аслу ерни тута.
Белгили болгъан кююнде, РФ-ни финанс министри Антон Силуанов да аянлашдыргъаны йимик гезикли Чакъырыв кагъызда эсгерилген яшавлукъ шартланы яхшылышдырмакъ муратда оьтгерилеген чаралагъа 2021-нчи йылгъа бюджетден 270 миллиард манат акъча маялар айырылажакъ. Шону булан дазуланмайлы 2022-нчи йылгъа да онгайлы яшавлукъ шартлар, къуллукълар болдурмакъ учун оьтгерилеген чараланы узатмакъ мурат булан дагъы да 130 миллиард манатны пайдаландырма умут этиле.
Уьстде де эсгерилгени йимик, ишлемеген-тишлемес деген месельде бир башлап ишге гючю чатагъан тайпалар учун иш ерлер болдурмагъа тюше. Шолайлыкъда, гьар тюрлю бюджетлеге жыйылагъан гелимлер де къолайлаша ва шону натижасында яшавлукъ масалаланы ёрукълашдырмагъа харжлар да топлана.
Дагъыстан Россияда лап да кёп яшлар тувагъан республика гьисапда белгили. Яшырмагъа тарыкъ болмай, шону булан бирче Дагъыстанда уьй-эшик болгъан агьлюлер оьзге регионлар булан тенглешдиргенде чакъда-чакъда бузула. Шолай агьлюлерде тувгъан яшланы оьсдюрюв ва тарбиялав буса янгыз аналаны яда буса аталаны башына тюше. Айтмагъа сюегеним, шолай агьлюлерде тарбияланагъан яшланы оьсдюрювге гележекде пачалыкъны янындан айлыкъ поссобилер гьисапда ломай харжлар айырылагъаны разиликни тувдурмай болмай.
Давдан улан тувмас деген кююнде, Владимир Путин де оьзюню Чакъырыв кагъызында дюньяда эришилюклеге ёл къоймайлы уллу ва гиччи пачалыкъланы арасында яшавлукъ байлавлукъланы беклешдирип парахатлыкъ болсун учун да гьаракатны бошамагъа къоймагъа тюшмей.
Мен ойлашагъан кюйде, Чакъырыв кагъызда айрыча хат булан эсгерилген шолай агьамиятлы масалаланы уьстюнлю кюйде яшавгъа чыгъармакъ учун Россиядагъы ич ва тыш политика гьаракатланы бир болуп якъламасакъ бажарылмайгъаны да аян.
Зумурут Мугьутдинова, ДР-ни загьматны ва яшавну якълав министри.
