Эндирейли 23 йыллыкъ къумукъ улан Рамазан Гьажимурадов Россияны примьер-лигасында ойнайгъан «Урал» команда булан узакъ болжалгъа дыгъар байлагъан. Екатеринбург шагьарны футбол командасында дагъыстанлы футболист 40-нчы номер булан ойнажакъ.

«Уралны» пресс-къуллугъу билдирген кюйде, Рамазан Гьажимурадов Эндирейде тувгъан, яшлайына Москвагъа гёчген ва футбол булан машгъул болгъан. «Торпедо» деген футбол школаны тарбиялавчусу.

Уллу спортгъа Рамазан Гьажимурадов 2017-нчи йылда гелген. Шо йыл ол ПФЛ-де ойнайгъан Домодедово шагьарны «Велеса» деген командасында ойнагъан. Шо команда учун оьтгерген 43 оюнда Рамазан Гьажимурадов 13 топ гийдирген.

Гетген йыл буса Рамазан Гьажимурадов ФНЛ-де ойнайгъан «СКА-Хабаровск» деген футбол команданы тюслерин якълагъан ва командада оьтгерген 50 оюнунда 10 топ гийдирген.

Биз Рамазан Гьажимурадовгъа спорт ёлунда оьрлюклер ёрайбыз ва ондан янгы уьстюнлюклер къаравуллайбыз.