Тюнегюн «Ёлдаш» газетни редакциясында Дагъыстан Республиканы школаларыны къумукъ тилден ва адабиятдан дарс береген муаллимлерини, алимлени ва дарс беривчюлени ортакъчылыгъы булан «дёгерек столну» айланасында пикру алышдырыв оьтгерилди. Шонда къумукъ тилден ва адабиятдан дарс береген муаллимлени ассоциациясын къурмакъны масъаласы арагъа салынды.
«Дёгерек столну» ортакъчылары Дагъыстан пачалыкъ университетни дагъыстан адабиятларыны кафедрасыны ёлбашчысы доцент Агъарагьим Солтанмуратов, ДГУ-ну дарс беривчюсю, муаллим Айханым Абдуллатипова, Къарабудагъгент юртдагъы гимназияны директоруну илму-методика ишлеге къарайгъан заместители Ругьаният Мусаева, Буйнакск шагьардагъы 9 номерли школаны муаллими Зулейха Агъавова, Атланавул гимназияны муаллими Айнутдин Аселдеров, Кёстек юрт школаны муаллими Супуяханым Бийболатова, Оьтемиш орта школаны муаллими Элмира Исаева ва башгъалары «Ёлдаш» газетни баш редактору Р. Акавовну сиптесин якълады. «Дёгерек столну» ортакъчыларыны пикрусуна гёре ассоциацияны асувлугъу булан къумукъ тил ва адабият дарсланы камиллешдирмеге, къумукъ тил ва адабият дарслардан муаллимлени гьазирлевде ва башгъа тюрлю масъалаларын чечмеге имканлыкъ болажакъ.
Къумукъ тилден ва адабиятдан дарс береген муаллимлени ассоциациясын къурмакъ учун биринчи жыйынны Магьачкъала шагьардагъы 59 номерли школада март айда оьтгерме гёз алгъа тутулду. Жыйынгъа ДР-ни бары да къумукъ районларыны ва юртларыны школаларында къумукъ тил, адабият дарсланы юрютеген муаллимлер чакъырылажакъ. Жыйын болажакъ гюню гьакъында къошум маълумат «Ёлдаш» газетде алданокъ билдирележек.
