Фельдшер-акушер пунктлар ачыла

Фельдшер-акушер пунктлар ачыла

      Алдагъы гюнлерде «Дагестан» деген маълумат агентлигинде ДР-ни савлукъ сакълав министри Жамалутдин Гьажиибрагьимов булан журналистлени ёлугъуву болду. Ёлугъув «Ачыкъ гьакимият» деген проектни айланасында оьтгерилди.


Министр медицина тармакъны янгы чалышывуну гьакъында айта туруп, бу йыл Дагъыстанда дагъы да 29 фельдшер-акушер пункт ачылажагъын билдирди. Ону сёзлерине гёре, «Савлукъ сакълав» деген милли проектни айланасында 19 фельдшер пунктгъа федерал бюджетден харж гёрсетилген, къалгъан 10-на буса ерли бюджетни харжы булан яшавгъа чыгъарылма гёз алгъа тутулгъан. Олар, биринчилей, медицина къуллукъчулар етишмейген ва олагъа бек харлы юртларда ачылажакъ. 2024-нчю йылгъа ерли буса Дагъыстанны бары да юрт ерлеринде ачылмагъа герек.


Министр эсгерген кюйде, районларда шолай пунктланы ачылмакълыгъы халкъ учун биринчи медицина-санитар кёмекни болдурувда кёп кёмек эте.


Эсгерилген бары да пунктлар, министрни айтывуна гёре, тезликде кёмек болдурмакъ учун бары да герекли къураллар булан ясандырылгъан ва гьалиги талаплагъа жавап бере.


Шолай да, министр журналистлер булан ёлугъувунда савлукъ сакълав тармакъда бирлешген пачалыкъ маълумат системаны кюрчюсюнде алдынлы цифровой къайдаланы къоллавда яшавгъа чыгъарывда чаралар гёрюлме башлагъанын эсгерди. Шогъар гёре фельдшер-акушер пунктланы 15-и Интернетге байлангъан ва олар оьзлени юртларында республика больницаланы врачлары булан гьакълашмагъа бола.