Кюсменчилик спортуну федерациясы къурулажакъ

Кюсменчилик спортуну  федерациясы къурулажакъ
Тюнегюн, февраль айны 25-нде, Дагъыстанны физкультурагъа ва спортгъа къарайгъан министерлигинде кюсменчилик (гребля) спортуну  республика федерациясын къурувгъа байлавлу гьаракатын болдурагъан сиптечилерини гьакълашыв генгеши оьтгерилди. 
 
Экинчилей оьтгерилеген шо генгешни барышында эсгерилген федерацияны уставыны проекти, олай да къурум конференцияны  оьтгеривню болжаллары арагъа салынып ойлашылды. Шондан къайры да, шону барышында оьзге тюрлю кёп санавда къурумчулукъ масъалалагъа да къаралды. 

 Ачыкълашдырып айтгъанда, март айны 4-нде оьтгерилежек Дагъыстанны кюсменчилик спортуну республика федерациясыны къурумчулукъ конференциясыны ортакъчыларын тастыкъ этивюню, олай да къонакъланы чакъырывну ёругъу мекенлешдирилди. 

Бизин уьлкени оьзге респкбликаларында кюсменчилик спортну оьсдюрювге байлавлу топлангъан сынавну уьйренмек де агьамиятлы  экени гьакъда да айтылды.

 Оьтгерилген гьакълашыв генгешни ишинде ортакъчылыкъ этген спорт якъдан гьазирлик гёрювню республика центрыны касбучусу Магьаммат-эмин Гьажиев, Магьачкъала шагьарда иш гёреген «Каспий» деген спортшколаны ёлбашчысы Мухтар Омаров, «Лотос» деген спорт-савлукъ сакълав комлексини ёлбашчысы Магьамматдагьир Эскендеров, физкультурагъа ва спортгъа, яшёрюмлени ишлерине, туризмге къарайгъан министерликлерини вакиллери арагъа салынып ойлашылагъан масъалалагъа байлавлу оьзлени пикруларын айтып малим этди. 

 Шо гьакъда айта туруп, кюсменчилик спортуну федерациясы къурулгъан сонг, бизин республиканы табии шартларындан пайдаланып, спортну шо журасын оьсдюрювге айрыча имканлыкълар ва шартлар яратылажакъ деп къаравулланагъанын да айрыча эсгермеге тюше.      

Автор: Н. БАЙБОЛАТОВ