Къарабудагъгент районну башы Магьмут Амиралиев коронавирусгъа къаршы вакцина этдирген

18 января 2021 в 20:14 90
Къарабудагъгент районну башы Магьмут Амиралиев бугюн, Избербаш шагьарны больницасына барып, оьзюне коронавирусгъа къаршы вакцина этдирген.

Районну пресс къуллугъу билдиреген кюйде, вакцина этип битген сонг, Магьмут Амиралиев районну ва республиканы ватандашларына чакъырыв этген. Ол оьзюню чакъырывунда биз барыбыз да оьзюбюзню ювукъ адамларыбызны гьайын этмеге герекни билдирген.

«Уллу чагъына етген ватандашларыбыз, жаваплы абатын алып, коронавирусгъа къаршы вакцинаны этдирмеге гереклер. Неге тюгюл де шо - оланы савлугъун сакълавгъа бакъдырылгъан чара. Сонг да, вакцина халкъ арада тез яйылгъан сайын, биз тез шо аврувдан арчылланажакъбыз, биз оьзюбюз уьйренген яшавну низамына къайтажакъбыз. Шо саялы да  оланы барысын да менден уьлгю алмагъа чакъыраман», -- деген Магьмут Амиралиев.

Билдирилеген кюйде, Магьмут Амиралиев булан бирге ону орунбасары Ибрагьим Абдулмажитов, Карабудагъгент район больницаны баш врачы Расул Гиравов, районну билим берив управлениесини ёлбашчысыны орунбасары Сайгид Гьажимагьаммадов ва оьзгелери коронавирусгъа къаршы вакцина этдиргенлер.