Къарабудагъгент районну Уллубийавулунда къарны балагьындан зараллангъан юртлуланы сиягьы этилип битген.
Бизге билдирген кюйде, бугюн юртну ёлбашчысы Руслан Абуев районну ЖКХ-сыны хас комиссиясыны уьюрлери булан бирге зараллангъан уьйлени айланып чыкъгъан.
Уьйлени тергеп чыкъгъан сонг, олагъа гелтирилген заралны оьлчевю токъташдырылгъан ва сонгунда зараллангъан ватандашлагъа кёмек этилежек.
Умуми кюйде алгъанда, Уллубийавулда эсде ёкъдан явгъан къардан 140 уьйге зарал гелтирилген. Ондан къайры да юртлуланы 60 гектаргъа ювукъ ердеги теплицалары бузулгъан. Янгыз шону гьисапгъа алып къойса да, юртлулагъа гелтирилген заралны оьлчевю миллионлар булан санала.
