Гюлю тайып, майы къалгъан гюлайлан

Авлакъларда ишлер токъталмай юрюй деме ярай. Гюзде гелеген йылгъа деп ашлыкълар чачыла, язбашда буса язлыкълар чачыла, сонг гюзлюклени къайтарыв юрюле. Арты булан сюрюв ва язлыкъланы къайтарыв башлана.

Бугюнлерде республиканы авлакъларында гюлайланны тюшюмю къайтарыла. Аслу гьалда шо Хасавюрт районда къурумлу юрюле. Районда гюлайлан 4246 гектарда ерлешген. Шоланы пайлап айтса, «Османюрт» 200 гектаргъа чачгъан, «Къазма» – 100, «Сивух» – 92, шолай башгъаларыны гьаракаты да гёрюне.

–Бугюнлерде гюлайланны 50 гектарын чалып битгенбиз, – дей «Къазма» СПК-ны башчысы Марат Атлыев. – Йыл къургъакъ гелгенге де къарамай, гьар гектардан 15 центнер тюшюм алабыз. Шо да – биз къургъакълыкъгъа чыдайгъан журасын чачгъангъа. Бугюнлерде, майны багьасы артып турагъанда, гюлайланны гьар бюртюгю де аявлу. Шону учун да гелим алывгъа тергевню бакъдыргъанбыз. Чакъ шулай арив турса, жуманы ичинде чалып битме хыялыбыз бар.

– Гьар йыл Хасавюрт районда гюлайланны авлакълары 5 минг гектардан кем болмай, – дей районну юрт хозяйство управлениесини баш касбусучу Расул Хасаев. – Бу йыл топуракъланы алышдырып чачгъан саялы, бираз кемиди. Гелеген йылгъа 1 минг гектаргъа артдырма хыял бар. Шону учун бизин имканлыкъларыбыз да, гючюбюз де бар, топуракъланы ишлетме тарыкъ болагъан техникабыз да етише. Ингдеси¸тарыкълы комбайнлар булан да таъмин болгъанбыз.

Гюлю тайып, майы къалгъан гюлайланны къайтарыв давам этиле