Дагъыстанны Гьисап палатасында республикада башланып, тек тамамланып битмеген къурулушланы масъалаларына байлавлу генгеш оьтгерген.
Генгешни барышында Дагъыстан Республикада ишленме башлангъан агьамиятлы къурулушланы тамамланывун толу кюйде яшавгъа чыгъармакъ учун гележекде нечик чаралар гёрюлме герек экенине байлавлу масъалалагъа къаралгъан.
Эсигизге салайыкъ, март айны орталарында Россия Федерациясыны Гьисап палатасыны председателини заместителини борчларын заманлыкъгъа кютеген Инсаф Хайруллин ишчи группа булан Дагъыстангъа гелген эди. Олар Избербаш, «Дагестанские Огни» шагьарларда болуп, оларда башланып, харж етишмейгенликге гёре битмей турагъан къурулушланы гьалы булан таныш болгъан.
Мисал учун, Избербашда сувну тазалайгъан имаратларыны къурулушу 2008-нчи йылда башлангъан. Бу шагьарда 300 аврувгъа ери булангъы больницагъа буса 2009-нчу йылда кюрчю салынгъан болгъан, тек гьали де битмеген. Дагъыстан Огни шагьарда да ишленип битмей турагъан канализация къуллукъну имараты 2008-нчи йылда башлангъан ва акъча ёкълукъгъа токъталгъан.
Москвадан гелип ахтарывлар юрютген РФ-ни Гьисап палатасыны къуллукъчуларыны таклифлерине гёре, ишленип битмей турагъан къурулушланы тамамламакъ учун федерал бюджетден таба харж маялар гёрсетилежек.
Максим ЭСЕНБИЕВ.
