Разия Исаевна Жамболатова гьаракатчы жамият чалышывчу, архив ишлени айтылгъан устасы гьисапда дагъыстанлылагъа тезден таныш. Артдагъы он йылланы ичинде маънасына гёре язывчулукъ даражагъа да гелишеген пагьмусу булангъы публицист гьисапда да хыйлы иш этген. Ол музей гьаракатына да гёрмекли кюйде къошум болдургъан. 5–6 китапны автору да дюр. Ондан къайры да, 100-ден де артыкъ илму асарлар, тюрлю-тюрлю темалагъа макъалалар да язгъан.

 

Разия Исаевна – Дагъыстандагъы «Маслагьат» деген жамиятны, «Дагъыстанлы къатын» деген къурумну президиумуну члени. Магьачкъалада орус интеллигенциягъа – муаллимлеге эсделик ясамакъны сиптечиси де дюр. Ата юрту Бугленде ва «Дагсвязьинформ» деген акционер жамиятында музейлени ачгъаны саялы «Россия Федерацияны маданиятында этген уллу къуллукълары саялы» деген гьюрметли белги булан, «РФ-ни маданиятыны ат къазангъан къуллукъчусу», «Дагъыстанны пачалыкъ къуллугъуну ат къазангъан къуллукъчусу» деген атлар булан савгъатлангъан.

Гетген йыл Разия Исаевна Дагъыстан китап издательствосунда «Соль земли» деген ат булан янгы китап чыгъарды.

Миллетибизни гьакъыллы ва жигерли гьаракатчыларыны бириси Разия Исаевнаны къатын-къызланы Халкъара гюню булан къутлайбыз. Огъар сёнмейген илгьам ва савлукъ ёрайбыз. Къаламынг къажымасын дейбиз.