Байрам саламат кюйде белгиленди

Байрам саламат кюйде белгиленди


Къаягент районгъа – 85 йыл

 

Къаягент районгъа 85 йыл болагъанына байлавлу байрамны коронавирус аврувну яйылыву гененип, эркин кюйде оьтгермеге имканлыкъ бермегенине талчыкъмай болмадыкъ. Тувулунгъан четимликлеге де къарамайлы, бу гёрмекли агьвалатгъа байлавлу байрам чаралар район центрда – Янгыкъаягентде къурумлу кюйде оьтдю десек, гьакъы­къатгъа къыйышмай къалмас.

 

Байрам мажлисни «Къаягент ра­йон» деген муниципал районну башчысы Магьаммат Элдерханов ачды.


Районну баш гьакими оьтгерилеген байрам чараланы ачылывуна байлавлу болуп берген баянында районну тарихинде оьтген, гьалиги ва гележек наслуланы къысматын суратлады, гёрмекли ва макътавгъа лайыкълы вакиллерин гьюрмет булан эсгерди.


– Районну 85 йыллыгъыны гьюрметине байлавлу болуп жыйында ортакъчылыкъ этегенлер булан бирче бизин якъда тувгъан ва оьсген гьалиги заманда райондан тышда яшайгъан ватандашларыбызны къуванчлы байрам агьвалат булан гьакъ юрекден къутлайман. Гележекде де районну атын ер болма къоймай, оьр этмек учун гьаракат этеген лайыкълы ватандашларыбызгъа айрыча баракалламны билдирмеге сюер эдим. Неге десегиз, оланы хас уьлгюсю оьзгелени де ругьландыра. Бизин районлуланы макътавлу ишлери гьакъда райондан, респуб­ликадан ва уьлкебизден тышда да белгили болгъан. Олар халкъара оьлчевюнде оьтгерилеген экономика, маданият, спорт, милли ярышланы савгъатлы ерлерине ес болгъаны гьакъда айтып къойсам да, кёп зат англашыла. Гьалиги заманда бизин аслу борчубуз – районну ­оьсювюню масъалалары гьакъда айта туруп, ерли экономиканы ва ону мердешли тармакъларыны оьсювюне аслу гючлени бакъдырмакъ. Юзюмчюлюк, гьайванчылыкъ, ашлыкълар оьсдюрюв булан янаша гьалиги алдынлы къайдаланы, сынавну къоллай туруп, теплицаларда овощлар оьс­дюрювден де къачмагъа тюшмей. Озокъда, шону учун онгайлы шартлар (инфраструктураны) да болдурма тюшегени англашыла. Сув болмаса, гёнгюл алмай гюл-чечек деген кюйде, гьалиги заманда бизин алдыбызда токътагъан аслу борч – адамлар ичеген ва авлакъланы сугъарагъан сув гьавузланы къуруп пайдаландырывгъа бермек. Айтмагъа сюегеним, етишген уьстюнлюклер бизин учун дазу тюгюл, о саялы гележекге белгиленген милли борчланы яшавгъа чыгъарывда да гьаракатны бошатмагъа тюшмей.


Шо гьакъда айта туруп, шатлыкъ жыйынны ортакъчылары оьзлени сёйлевлеринде ерли мердешлеге аминликде гележек наслуланы тарбияламагъа тюшегени гьакъда эсгермей болмады. Савлукъ сакълавда, билим беривде, маданият, спорт ва шолай оьзге тармакъларда оьсювню болдурмакъ учун тергевню артдырып иш гёрмеге тюшегени гьакъда да пайдалы насигьатлар берилди.


Байрам чараланы барышында районну социал-экономика оьсювюне аслам къошум болдургъанлагъа гьюрметли атлар ва багьалы савгъатлар да тапшурулду.


Районну маданият цент­рыны башчысы Умукюсюм Агъаеваны сиптечилиги булан гьазирленген ва оьтгерилген чебер коллективлени усталарыны чыгъышлары къаравчуланы къурчун къандырды.


 

Къ. Къараев.

Суратларда: байрамдан гёрюнюшлер