Март айны уьчюнде милли сиясатгъа къарайгъан министерликде республика газетлени вакиллерин, жамият чалышывчуланы , алимлени ортакъчылыгъы булан жыйын оьтгерилди. Эсгерилген тармакъны министри Энрик Муслимов жыйынны ача туруп айтгъан кюйде, бу гьаракатны далапчылыкъ булан машгъул тюгюл «Толеранс» деген къурум оьтгерегенни билдирди. Ерли гьакимлик къурумланы гьакъында янгы Федерал законну къабул этген сонг кемчиликлер болагъанны эсгере туруп, законну проектине гёре айтмагъа Дагъыстанны Жамият палатасыны члени, «Толеранс» деген къурумну ёлбашчысы Абсалитдин Мурзаевге сёз берди.

 

А.Мурзаевни сёйлевюнде оьрде эсгерилген проект милли сиясатгъа къарай­гъан министерликни якълаву да булан 2006-нчы йылдан берли белгили эди. Тюзелтивлер де болгъан, тек лап да аз тюзелтивлер ерли гьакимликге тиеген проект­ге тюшген.

– Конституциягъа тюзелтивлерде тюзлюк бойда ерлешгенлериндеги Хумторкъали, Къарабудагъгент, Къаягент ва оьзге районлардагъына биз аслу тергев этдик, – деди А.Мурзаев. – Неге тюгюл де, бу районларда кёп тюрлю миллетлер яшай. Гьар тюрлю разисизликлер тувулунма бола. Анг­латыв ишлер юрютдюк. Бу ишде сиясат министерлиги де ягъада къалмады. Милли газетлени редакцияларына бардыкъ. Олар да якълады, газетлени бетлеринде анг­латыв ишлер юрюлдю. ДР-ни Халкъ Жыйынында бу масъалагъа байлавлу «дёгерек стол» оьтгерилди. Алимлер сёйледилер. Газетлени арасында «Новое дело» проектге гёре макъалалар чы­гъарып турду. Ра­зисизликлер де тувулунду. Юртлардагъы гьакимликни тайдырмакъ булан адамланы арасында разисизликлер тувдура ва оьзге къаршылыкълар болма бола.

Гьар ерли гьакимлик 2005-нчи йылда оьзлени уставларын къабул этме герек эди. Арагъа салып, жыйын да этип, гьар тюрлю масъалаланы гьакъында ойлашып, мекенли устав къабул этгенлер 700-ден де къолай ерли гьакимликлени арасында 47 бар. Къалгъанлары бир жы­йын да оьтгермей, бюджет масъалалагъа да къарамай, шу ишге уьстденсув янашгъан. Артдагъы йылларда ерли гьакимликге депутат корпусдан таба сайлана­гъанлар бар. Онда да юрт масъалалагъа жаны аврумайгъанлар сайлана. Къарабудагъгент районда 52 депутат бар эди. Мен де шоланы арасында эдим. Бир депутат сама районну башчысына сёз айтып, юртуну масъалаларын арагъа салып болмай эди. Демек, депутат этилип юртуна, халкъына жаны авруйгъанлар сайланма герек. Шону учун да проектни гьакъында гьакълашывлар оьтгерме, тюзелтивлер этме герекни унутма ярамай.

А. Мурзаевни сёйлевюнден сонг соравлагъа жавап­лар берилди, оьзлени пик­руларын айтагъанлар да болду.