Арсланали Арсланбеков: «Маданиятны ва инче саниятны масъаласын да гётережегине инанаман»

Арсланали Арсланбеков: «Маданиятны ва инче саниятны масъаласын да гётережегине инанаман»

Россияны Президенти В.В. Путинни Федерал Жыйынгъа гьар йыл этилеген Чакъырывуна мен бек тергевлю кюйде тынглайман. Гетген йылгъы Чакъырывунда В.В. Путин Россияны Конституциясына этилеген алышынывлагъа ва къошувлагъа, коронавирусгъа къаршы ябушувгъа айрыча агьмият берсе де, социал-экономика масъалаланы да ягъада къоймады. Россияны Федерал Жыйынына бу йыл этилежек Чакъырывунда да В. В. Путин социал-экономика масъалаланы бирдагъы да гётережегине мен герти кюйде инанаман. Социал-экономика масъалаланы ичинде маданиятгъа ва инче саниятгъа тиеген масъалаларда болар деп умут этемен. Айтагъаным, маданият ва инче саниятны тармагъында чалышыгъанланы айлыкъ алапалары да, материал-техника базасы да ончакъы макътардай тюгюл. Бизде маданият къалалар, клублар ёкъ юртларыбыз бар. Маданият къалалар бар юртлардагъы биналар тезден эсги болгъан, бузулгъан. Ишлейген маданият къалалар да гьалиги талаплагъа жавап бермей. Маданияты ёкъ халкъны гележеги де ёгъу англашыла.

 

Ватангъа бакъгъан сююв адабиятдан, инче саниятдан, тарихни уьйренивден башланадыр деп ойлайман. Тарихи ёкъ халкъ -- унутулгъан халкъ. Гележек яш наслуну тарбияламакъ учун адабиятыбызны, маданиятыбызны ва инче саниятыбызны сакъламагъа, оьсдюрмеге тюшедир. В. Путинни Федерал Жыйынгъа этилеген бу йылгъа Чакъырывунда маданиятны ва инче саниятны масъалалары аслу ерлерден бириси болуп токътар деп умут бар. Россияны халкъларыны бырынгъа заманлардан тутуп да терен тарихи, адатлары ва мердешлери болуп гелеген. Олар гьали де сакълангъан. Тилибизни, тарихибизни, маданиятыбызны ва инче саниятыбызны гележек наслулар учун сакъламакъ бугюн бизин барыбызны да тувра борчубуз. Шону учун да, маданиятны ва инче саниятны материал-техника базасын оьсдюрмеге тюше. Шону буса В. Путин этмеге бола.

 

Арсланали Арсланбеков,

Хумторкъали районну Тёбе поселогундагъы инче саният школаны директору, "Сарихум" деген яшланы бийив ансамблини ёлбашчысы, Дагъыстан Республиканы инче саниятыны ат къазангъан къуллукъчусу