Янгыртывланы ёлунда

Янгыртывланы ёлунда


      Гьапкъайгент – Къаягент райондагъы къумукъ юртланы бириси. Районну оьзге юртларында йимик, мунда да юрт ва юртлулар учун тазалыкъ болдурувну масъалалары ерли админист­рацияны, депутатланы алдында токътагъан аслу борчлардан бириси гьисаплана.

 

Юрт мунуципал къурулувну админист­рациясыны башчысы Магьамматгьажи Амиров, ерли депутатлар булан бирче уьстде эсгерилген масъалаланы чечмек учун токътавсуз иш юрюте. Оланы гьаракаты булан юртну баш орамына асфальт салынгъан. Юрт администрация, фельдшер пункт, маданият уью ерлешген биналагъа ремонт ишлер этилген.


2018-нчи йылдан тутуп, Россияны бары да регионларында, муниципал къурулувларында ял алывну ерлерин онгарыв деген федерал программаны яшавгъа чыгъарыв гьаракаты Гьапкъайгентде де юрюле. Шо ишге юртлу гьакимлер ерли идараланы къуллукъчуларын, муаллимлени, тарыкъ болгъан гезиклерде, ерли школаны охувчу яшларын да къуршайлар. Шолай ортакъ ишлени натижасында Гагаринни атындагъы, «Советский» деген орамлагъа чакъа тёгюлген ва тегишленген.


Мунда юртну ичиндеги чёпню ­яйылмагъа къоймай сакълайгъан хас ер ­онгарылгъан. Мургук юртгъа элтеген ёлну боюндагъы къолну ичинде шо муратда къую къазылгъан. Ону айланасы бегетилген, тазалыкъны болдурувну чаралары даим гёрюле.


Юртну ичинде оьтгерилеген гьар тюрлю ишлерде депутатлар Хизри Мамакъадиев, Алимпаша Муртазалиев, Магьамматали Алибеков ва оьзгелери актив ортакъчылыкъ эте.


Депутатланы яхшы ишлери гьакъда айта туруп, оланы ва юрт администрацияны ёлбашчысы М.Амировну гьаракаты булан юртну ичинде гьар тюрлю налоглар заманында жыйыла­гъаны гьакъда да эсгерме сюемен. Район оьлчевюнде налог­лар жыйывну гьасиллерин чыгъаргъанда гьапкъайгентлилер юрт муниципал къурулувланы арасында лайыкълы 3-нчю ерге гётерилген.


Маданият уьйню бинасыны ичи, тыш ягъыны майданы аз тюгюл. Шогъар да къарамайлы, оланы барысына да ремонт этилген. Кинозалны, сагьнаны поллары, пурхасы алышынгъан, тамларына акъчабылгъан, сырлангъан.


– Бинаны къалкъысы эсги болуп, бузулуп тёгюлме тура эди, – дей Алимпаша. – Гьали гёресиз. Олар барысы да янгыртылгъан. Темир тутулгъан. Ремонт ишлер бизин маданият къуллукъчуларыбызгъа кёп йыллар арив ишлемеге шартлар яратды. Бугюн маданият уьюню биринчи къабатында спортчулар учун да тийишли шартлар яратыла. Ремонт ишлер тамамлангъан сонг, мунда спортну кёбюсю жураларындан спорт секциялар ачылажакъ.


Маданият уьюнде де бугюн маданият къуллукъчуларына ишни даражасын, сан янын гётермеге тийишли шартлар яратылгъан. Бинаны ичине гирген адам арив онгарылгъан кабинетлени гёргенде маданият уьюнде юрюлеген ишлер башгъачалай болажагъына бир де шекленмей. Гьаракатчы касбучу Галина Юрьевна Къазиагьматованы ишлери дагъы да алгъа баражакъ.


Юртлулар мундагъы китапханагъа, охувчу яшлар, оьрюм яшлар гьар тюрлю кружоклагъа, спортну секцияларына юрюп, оьзлени билимин ва савлукъларын артдыражакъгъа шекленмей.