Уьлгюлю чалышагъан Умай

       Языв ярдан къаратыр, юхлайгъан еринден уятыр деп, негьакъ айтмагъан. Яшав шартлары оьзюн яшлар бавуна гелтирген Умай САЛАГЬБЕКОВА Магьачкъала шагьардагъы 81 номерли яшлар бавунда чалышагъанлы 32 йылгъа айлангъан. Ондан алда буса Умай техникумну битдирип, 18 йыллыкъ чагъындан башлап, сапар бюросунда туризм тармакъда ишлеген. Демек, адамлар булан къатнап, оланы ишлемейген гюнлеринде ял алагъан базаларына йибермекни гьайын этип чалыша болгъан.

 

– Шо заман ишлейген халкъ жуманы ахырында 3 гюнге ял алмагъа бара эди. Дагъыстанны турбазаларындан башлап, Нальчикге, Пятигорскиге, Орта Азиягъа, Прибалтикагъа ял алмагъа барып геле эди. Ишимни нечакъы да сюе эдим. Яшлар бавунда ишлежекмен деп бир де эсиме гелмей эди, – дей ол. – Неге тюгюл туризм тармакъдагъы ишимни бек ушата эдим. Сонг уьйленип, яшларым болгъан сонг, яш гьазир авруп къалагъангъа гёре, ишден таймагъа борчлу болдум. Магъа ишден тай деп айтагъан адам да ёкъ эди. Авлетим учун уьйде кёп къалмагъа тюшегенине гёре, иш ёлдашларым, ёлбашчыларым мени учун тарчыкълыкъгъа тюшмесин деп, гёнгюллю кюйде оьзюм ишден арза язып гетдим. Туризм тармакъда 8 йыл ишледим. Магъа шонда ишлейген йылларда пачалыкъны янындан яшавлукъ уьй де берилди.

Озокъда, жаваплы адам болмаса, ким де шолай къараргъа гелмеге болмайдыр. Сонг буса Умай оьзю яшайгъан уьйню ювугъунда яшлар баву ачылгъанда, онда ишлейген къардашына кёмекге геле. Яшлар бавуна гьар тюрлю къуллукълагъа ишчилер герек вакъти, Умайны тигивчю гьисапда ишге чакъыра. Тигивге Умай охумагъан, оьзю уьйренген. О вакътини эсге ала туруп, яшлар бавунда шо заманларда бетин, къолун сибиреген явлукълардан башлап, яшланы тёшек шаршавларын тигип, эшик-терезеге илеген шаршавлагъа ерли иле болгъан.

Сонг завхозну ери бош болгъанда, огъар 1998-нчи йылда бу къуллукъну башын тутмагъа таклиф эте. Шо гюнден бугюнлеге ерли Умай яшлар бавунда хозяйство тармагъына къарайгъан заместителини къуллугъунда чалыша. Гьалиги талаплагъа гё­ре яшлар бавуну абзарындан, терегинден, ташындан дегенлей, ичиндеги ясандырывларына, мал- матагьына, къуллукъчуларына ер­ли Умай Салагьбекова жаваплы.

–Гьали мен ишимде менеджер де болмагъа, компьютерни, Интернетни къоллап чалышмагъа борчлуман. Шолагъа барына да курслагъа барып уьйренгенмен, – дей Умай.

Ишигизде ёлугъагъан къы­йынлыкълар боламы? – деген соравгъа Умай булай жавап берди:

–Яшлар бавунда 30 йылдан артыкъ чалыша туруп, эртен абзаргъа гиргендокъ, бир кемчилик бар буса, шоссагьат гёремен. Абзарны тазалайгъан, тазалыкъны юрютегенлер бир-бирде оьз­лени ишин тындырыкълы кютмей, гёрсетип де этдирип болмайгъанлары да ёлугъа. Кёбюсю, бизге къыйышагъан, гьакъ юрекден ишлейген къуллукъчуланы тапмагъа да къыйын бола. Яшлар тура­гъан ерде тазалыкъ инг биринчи ерде деп айтмагъа ярай. Бир айны узагъында, мекенли къуллукъчу тапгъынча, оьзюм сагьат бешде гелип, яшлар бавуну абзарында тазалыкъны сакълап турдум. Гьали ишлейген къуллукъчугъа разимен. Башгъа не къыйынлыкъ болсун, гьар гюнлюк ма­съалаланы чечмеге къаст этебиз. Бизин тарбиялавчуларыбыз да – кёпден берли ишлейген касбучулар. Яшлар бавуну заведующийи Бэлла Жамалутдинова да коллективни алдына тюшюп, барыбызгъа да уьлгю гёрсетип чалышагъан адам. Адамлыкъ якъдан да, касбучу якъдан да оьр даражада ишлеп бажара. Коллективде бирлик бар.

Умай Салагьбекованы ата юрту – Дёргели. Оьзю ол 1958-нчи йылда Магьачкъалада тувгъан ва оьсген. Оьзюню ишини, яшавуну гьакъында хабарын узата туруп, яшлар бавундан гьали гетме де сюймейгенни айтды ва: «Гиччипавлар бар ерде берекет де, шатлыкъ да, сююнч де бар», – дей.

Умай агьлюсю булан 4 къызны тарбиялагъан. Уллу къызы психолог касбугъа охуса да, яшлар бавуна гелип ишлемеге башлагъан сонг, бу ишден дагъы айрылып болмагъан. Бугюнлерде «Сафинат» деген яшлар бавунда чалыша. Бириси къызлары да гьариси яшавда оьз ерин тапгъан, уьйленген.

Авторизация
*
*
Регистрация
*
*
*
Согласны с условиями сайта?
Генерация пароля