Итнигюн Магьачкъаладагъы Милли инновация коллежни студентлери булан «Ёлдаш» газетни вакиллери ёлугъув оьтгерди.  Ёлугъувда студентлер, коллежни директору Гулияр-Ханум Аминова, ону заместители Зария Байсонгурова, «Ёлдаш» газетни  баш редакторуну заместители,  белгили шаир Казим Казимов, жамият яшав бёлюгюню  редактору Патимат Бекеева ортакъчылыкъ этди.

Ёлугъувну башында Гулияр-Ханум Гьажиевна студентлеге ана тилни агьамиятлыгъыны гьакъында оьзюню яшавундан мисаллар гелтирип сёйледи.  Асил ана тилибизни  унутмай яшамакъны, ана тилинде  китапланы, журналланы, газетлени охумагъа чакъырыв этди. Казим Казимов газетни  гьакъында айта туруп, газетни ишини, гётереген масъалаланы, ерлешдирилеген макъалаланы гьакъында эсгерди.

Патимат Бекеева оьюню янындан студентлени, яшёрюмлени яратывчулукъ пагьмулары бар буса яшырмай арагъа чыгъармакъны, газетге макъалалр яхмакъны таклиф этди.  Мисал гьисапда  белгили алим, медицина илмуланы доктору, академик, эндокринолог Гьели юртлу  Сагьадулла Абусуевни яратывчулукъ пагьмусун, кёп йылланы узагъында  газет булан байлавлукъ тутгъанын эсгерди.    Студентлер булан пайдалы ёлугъув болду. Эсгерилген ёлугъув оланы эсинде къалажакъгъа, гележекде яшёрюмлени арасында бизин охувчуларыбызгъа артажакъгъа умутуз бар.

Милли инновация коллежни ёлбашчылары, дарс беривчюлери гьар йыл «Ёдаш»  газетге язылагъанны да  эсгермеге сюебиз.  Студетлер булангъы ёлугъувну яшавгъа чыгъаргъан Зария Ибрагьимовнагъа  айрыча баракалла билдиребиз.