Шо гьакъда март айны 3-нде «Дагестан» деген маълумат агентлигинде оьтгерилген прес-конференцияны вакътисинде Россия Федерацияны Пачалыкъ Думасыны депутаты, Россияны Загьмат партиясыны ёлбашчысы Сергей Вострецов ва «Промышленност ва далапчылыкъ тармакъда чалышагъанланы дагъыстан союзу» деген бирлешивню президенти, Россияны Загьмат партиясыны Дагъыстандагъы регион советини ёлбашчысы Анварбек Къадиев билдирдилер. Шо гюнгю ёлугъувну вакътисинде Темиркъазыкъ-Кавказ федерал округда оьтгерилген партияны съездини ва Темиркъазыкъ Кавказда ерлешген шагьарларда «Уьзюрю агьлюлеге аналыкъ капиталны яшлагъа берилеген пособие гьисапда къолламагъа ихтияр бермеге тарыкъ» деген машинлер гьайдап оьтгерилген акцияны да гьасиллери чыгъарылды.
Бу йылны январ айында Россияны Загьмат партиясыны Дагъыстандагъы бёлюгю аналыкъ капиталны кёп яшлы ва яшавлукъ этмеге харжы ёкъ агьлюлер учун къолламагъа тарыкъ деп таклиф этген. Олай демек, оьрде эсгерилген агьлюлер учун аналыкъ капиталдан гьар айда 10 минг манатны къадарында акъча гёрсетиле демек бола.
Россияны Загьмат партиясыны ёлбашчысыны сёзлерине асасланып айтгъанда, булай чараланы яшавгъа чыгъармакъ гьали Россиядагъы четим шартларда айрыча агьамияты бар. «Кризис» деп айтылагъан четим гьаллардан чыкъгъан сонг, балики, аналыкъ капиталны шу меселде къолламагъа тарыкъ да болмас. Кёп яшлы агьлюлерде яда яшавлукъ шартлары четим агьлюлер учун этилеген онгайлы шартлар яратыв сипте булан партияны ёлбашчылары Россияны Президенти В. Путинге ерли чыгъажакъ.
Россияны Загьмат партиясыны Дагъыстандагъы регион советини ёлбашчысы Анварбек Къадиев оьзюню сёйлевюнде СКФО-ну бары да регионларындан оьтюп гелген таклифни гьакъында маълумат берди. Ол эсгергени йимик, ерли халкъ да бу таклифни яны болуп якълагъаны, аналыкъ капиталдан гьар айда 10 минг манат юртагьлюлер учун шайлы кёмек болагъаны гьакъда да айтды.
Бу масъалагъа байлавлу чаралар Россияны оьзге регионларында да оьтгермек гёз алгъа тутулгъан.
Барият ОЬЛМЕСОВА.
СУРАТДА: прес-конференция юрюлеген вакъти.
Автор чыгъаргъан сурат.
