Бу йылны август айыны ахырында Калининград областда «Земля спорта» деген Бютюнроссия марафону оьтгерилежек. Бугюнлерде бизин уьлкени регионларында шо марафонну ерли тиретлери юрюлюп тура.
Шолай, талатгюн, август айны 13-нде, Магьачкала шагьардагъы «Труд» деген стадионда Россияны юрт хозяйство министрлигини сиптечилиги булан оьтгерилеген байрамгъа бизин республиканы юртларындан гелген 300-ге ювукъ спортчу къуршалды.
Шо гьаракатны сиптечилери мухбирлеге билдиргени йимик, эсгерилген спорт байрамы «Юртланы умуми кюйде оьсдюрюв» деген пачалыкъ программаны оьлчевюнде оьтгерилген. Юртлуланы спортну гьар тюрлю журалары булан машгъул болмагъа, олай да оланы санлы яшав юрютювге иштагьландырмакъ оьтгерилген спорт байрамны алдына салынгъан аслу борчлардан гьисаплангъан. Шону булан бирге, уллу юртларда да, гиччирек отарларда да спортну гьар тюрлю журалары булан машгъул болувгъа шартлар яратывну агьамиятлыгъына ерли гьакимлик къурумларыны тергевюн бакъдырмакъ да шо спорт байрамны барышында яшавгъа чыгъарылагъан аслу муратлардан бириси болуп токътагъан.
Оьтгерилген спорт байрамны ортакъчылары енгил атлетикадан, гьар тюрлю оюнлардан оьтгерилген ярышларда ортакъчылыгъын болдурду. Олагъа ГТО-ну гесимлерин кютмеге де имканлыкъ берилди. Шо гюн оьтгерилген ярышланы алдынлылары шоланы финал тиретинде ортакъчылыкъ этежек.
Насрулла БАЙБОЛАТОВ
