Дагъыстанны Ич ишлер министерлиги хоншу Мычыгъыш Республиканы Шали районунда тувгъан 41 йыллыкъ Али Демильхановну ахтарывгъа берген. Министерликни маълумат бёлюгю билдиреген кюйде, ол Дагъыстанда яшына, оьзюн танымасын учун янгыз гёзлери гёрюнеген къара къатынгиши опуракъланы гийип юрюй.

А.Демильханов террорчу къурумлагъа къошулгъаны хыйлы бола, бандит  гюп къуруп, бир нече савутлу чапгъынларда ортакъчылыкъ этген. 2017-нчи йылны башларында полицейскийлер «Хасавюрт – Тлох» ёлда ону машинин токътатма  къарагъанда, жинаятчы автомат булан атышып, аманлыкъны  къоруйгъан­ къурумну эки къуллукъчусун яралагъан.

Шо йылны гюз айларында дазу сакълавчулар Курск областны Тёткино деген юртунда белгисиз адамлар айланагъанын токъташдыргъан.  Оланы  яшыртгъын сокъмакълар булан Россиядан Украинагъа чыкъмагъа хыялы болгъан. Асгерчилер документлерин тергеме сюйгенде, къаршылыкъ билдирген ва атышыв башлангъан. Экевю оьлтюрюлген, бириси тутулгъан, бирдагъысы къачып къутулгъан. Къутулгъаны бандит гюпню башчысы А.Демильханов.

Алав Алиев.