Бугюнлерде Башкъыртстанны тахшагьары Уфада «Россияны тюрклери» деген форуму юрюлюп тура. Эсгерилген республиканы ругьани управлениесини, Башкъыртланы бютюндюнья конгрессини ва оьзге жамият бирлешивлерини сиптечилиги булан оьтгерилеген шо агьамиятлы гьаракатны ишине бизин уьлкени тюрк къавумуна гиреген халкъланы белгили шаирлери, язывчулары, алимлери, инчесаниятыны, маданиятыны ва оьзге тармакъларыны атын айтса, эл таныйгъан, демек, гёрмекли вакиллери  къуршалгъан.

Оьтгерилеген форумда къумукъ халкъны атындан «Тангчолпан» журналны жаваплы редактору, шаир ва таржумачы Супиянат Мамаева, белгили шаир, язывчу, драматург ва таржумачы Гебек Къонакъбиев, олай да Россияны Илмулар Академиясыны Дагъыстан федерал илму-ахтарыв центрыны Тил, адабият ва инчесаният институтуну фольклор бёлюгюню ёлбашчысы, филология илмуланы кандидаты Агъарагьим Солтанмуратов  ортакъчылгъын болдура.

Бизге белгили болгъаны йимик, Россия­да яшайгъан­ тюрк халкъланы бирлигине болушлукъ этмек, къатнавун гючлендирмек форумну алдына салынгъан аслу борчлардан болуп токътай. Шону булан бирге, шо  гьаракатны барышында оьтгерилген ёлугъув­ларда, конференцияларда, генгешлерде бизин уьлкени тюрк къавумуна гиреген халкъларыны миллет  менлигини белгиси гьисапда ана тиллерин сакълав, олай да маданият, инчесаният, адабият, тарих ва яшавлукъ масъалалары арагъа салып ойлашыла. Шондан къайры да, торайып гелеген яш нас­луну вакиллерине  ата-бабалардан къалгъан ругь байлыкъгъа бакъгъан якъдагъы гьасиретликни  гьислерин сингдирмек учун артгъа салмай яшавгъа чыгъармагъа тюшеген  чаралар малим этиле, спортну милли жураларына да тергев бериле.  

Уфа шагьардан бизин булан телефон сёйлейген вакътисинде Супиянат Мамаева билдиргени йимик, гьар къонакъгъа тергевлю янашып, инг алда оланы гьарисин самолётдан тюшгенде узатып, къонакъюйде ерлешдирмек тынч иш тюгюл. Шо намусланы форумну сиптечилери оьр даражада кютген, инг алда гечортада аэропортда оьзлени савлай дюньягъа айтылгъан татлилиги – башкъырт балы булан сыйлап къаршылагъан.­ Чикдеси, форумну барышында шону ортакъчыларына тюрк къавумлагъа гиреген халкъланы вакиллери булан эркин кюйде къатнамагъа шартлар яратылгъан. Оланы адабияты, инчесанияты, маданияты булан таныш болмагъа, маълумат къураллагъа баянлыкълыкълар берип, къумукъ халкъны алдында токътагъан масъалаланы гьакъында айтмагъа имканлыкъ берилген. Шо якъдан алгъанда да, форумда ортакъчылыкъ этмени кёп уллу маънасы бар.

Форумну оьлчевюнде оьтгерилген генгешде жыйылгъанланы алдында чыгъып­ сёйлей туруп, Супиянат Мамаева ана тилни сакълавда уллулар ва яшлар учун чыгъагъан милли адабият журналланы агьамиятлыгъы гьакъда айтгъан. Гебек Къонакъбиев дагъыстанлы игитлени уьлгюсюнде торайып гелеген яш наслуну патриот ругьда тарбиялавну имканлыкъларын малим этген. Агъарагьим Солтанмуратов фольк­лор асарларда къумукъ халкъны милли менлигин суратлавну айланасында лакъыр юрютген.

«Россияны тюрклери» деген уьч гюн давам этилген форум бугюн, август айны 16-сында, оьзюню ишин тамамлай. Тюрк халкъланы бирлешивюне ёл ачагъан шо гьаракатны гьасиллери гьакъында газетни  гелеген номерлерини бирисинде бизин охувчулагъа генг кюйде айтмагъа гёз алгъа тутулгъан.

Б. АЙБОЛАТОВ.