Гьар йыл да мердешленип гелеген кюйде, август айны экинчи сонгугюнюнде савлай уьлкеде физкультурниклени гюню белгилене. Шо гюнге багъышланып бу йыл да савлугъун беклешдирмек учун спортну гьар тюрлю журалары булан машгъул болуп гелеген яшланы да, уллуланы да къуршап, шагьарларда йимик юртларда  да кёп тюрлю гьаракатлар  оьтгерилмеге гёз алгъа тутулгъан.

Бу йыл Россияда Агьлюню йылы  белгиленегени гёз алгъа тутулуп, оьтгерилеген шо гьаракатлагъа ата-ананы оьзлени авлетлери булан бирче къуршавгъа, шолайлыкъда, торайып гелеген яш наслуну санлы яшав юрютювню мердешлерин сакълавгъа  иштагьландырывгъа айрыча тергев берилежек.  

Шону булан бирге, шагьарларда кёп къабатлы уьйлени абзарларында, артдагъы вакътилерде уьлкени ва республиканы оьлчевюнде тасдыкъ этилген милли проектлени ва программаланы яшавгъа чыгъарывну оьлчевюнде  пайдаланывгъа берилген спорт майданчаларда, ял алыв бавларда къужурлу гьаракатлар да оьтгерилежек. Ачыкъ—лашдырып айтгъанда, ата-аналар оьзлени авлетлери булан бирче ортакъчылыкъ этмеге  болагъан кюйде  енгил атлетикадан, шагьматдан, олай да спортну милли журала—рындан ярышлар, «Биз спорт яябыз» деген суратланы выставкасы-конкурсу оьтгерилежек деп къаравуллана.

Шо гьакъда айта туруп, физкультурникни гюню бизин уьлкеде 1939-нчу йылдан тутуп оьтгерилегенин айрыча эсгермеге тюше. Бугюнлерде де шо гюн оьтгерилеген гьаракатлар «Спорт – яшавну аслу гелиши», «Демография» деген  милли проектлени гесимлерин яшавгъа чыгъарывну аслу шарты болуп токътай. Шо гюн спортну гьар тюрлю жураларындан мекенли оьрлюклеге етип, янгыз уьлкени оьлчевюнде тюгюл,  халкъара ярышларда  алдынлыкъ алгъанланы  абурлайгъан, сыйлайгъан гьаракатлар да оьтгерилежек деп къаравуллана.

Б. АЙБОЛАТОВ.