– Мен ишде турагъан заманда, намаз жувунмагъа онгайлыкълар ёкъ саялы, аякъларымны бираз ариде жуваман. Шо кюйде намаз жувунмагъа яраймы?

– Намаз жувунувну этмеге яхшы ишлерини арасына санланы жувагъанда оланы бёлмей, токътамай арты-артындан жувмакълыкъ гире. Бир сан къуругъанча башгъасын токътамай, бир урунуп намаз жувунмакъ яхшы санала. Шо саялы намаз жувунагъанда бир сан къуруса да, намаз жувунувну узатмакъ ярай, шолай намаз жувунув къабул этиле. Амма намаз жувунувну бир сан къуруп, сонг узатмакъ яхшы саналмайгъанны билмеге герек.

– Намазлыкъны уьстюнде яда намаз къылагъан адамны опурагъында къатынгишини тюклери болуп чыкъса, шо намазны бузамы?

– Ёкъ, шолайлыкъ намазны бузмай, неге тюгюл адамны тюклери, къатынгишиники болсун, эргишиники болсун нажжас саналмай. Шолай болгъанда адам тюклер намазлыкъда яда опуракъны уьстюнде болса, намаз бузулмай, къабул этиле.

Амма шо тюклер магьрам саналмайгъан ят къатынгишиники буса, эргишиге шолагъа къарамагъа ярамай, гьарам, неге тюгюл къатынгишини тюклери аврат санала, авратгъа къарамакъ буса гери урула.

– Ойлар якъ-якъгъа гетмесин учун, гёзлени юмуп, намаз къылма яраймы?

– Намаз къылагъанда гёзлерин юммакъ этмесе яхшы ишлеге санала. Амма гьузур деп айтагъан гьалгъа гелтире буса, шолайлыкъ яхшы санала.

Имам ан-Навави булай айта: «Мени эсиме гелеген кюйде, гёзлени юмгъан булан къоркъунчлукъ ёкъ буса, шолай этмесе яхшы деп айтмагъа тюшмей, неге десе гёзлени юммакъгъа тувра гери урув ёкъ. Токъташгъан гьадислерде шолайлыкъ ёкъ».

Шолай болгъан сонг, гёзлени юмуп гьузургъа (юрекде токъташгъанлыкъ) етишмеге бола буса ва саламатлыкъ тува буса, шолай этмеге ярай.

Магьаммат АБУЕВ.