Алдагъы гюнлерде Дагъыстанны Гьукуматыны Председатели Абдулмуслим Абдулмуслимов иш сапар булан Агъул ва Рутул районлагъа гиреген  юртлагъа баргъан. Шо  сапарыны барышында бизин республиканы премьер-министри ерли гьакимлик къурумларыны ёлбашчылары ва «Дагестанавтодорну» касбучулары  булан бирче телиянгурлардан сонг гелген ташгъынлар себеп болуп бузулгъан имаратлагъа къарагъан.  

Ачыкълашдырып  айтгъанда, ол Тпиг-Рича деген кёпюрню ярашдырып  янгыртывгъа байлавлу юрюлеген ишлени барышына тергев этген.  Шо кёпюр  бузулуп чёкгенликни натижасында Рича, Бедюк ва Чираг юртларда яшайгъанлар енгил, олай да авур ташыйгъан машинлер  юрюмейли  байлавлукъсуз къалгъан. Бугюнлерде   бузулгъан кёпюрню еринде агъачдан   этилип гёчюв салынгъан. Шо да  юртлулагъа  яяв юрюп  кёпюрден  оьтмеге, оланы инг алда  тарыкъ болагъан  яшавлукъ агьамияты булангъы маллар  булан  таъмин этмеге  имканлыкъ яратгъан.  Шону булан  бирге, бугюнлерде  оьзенни  тогъай бойларын  тазалавгъа  байлавлу  ишлер де  юрюле.

Шондан  сонг Дагъыстанны премьер-министри «Мамраш — Ташкапур — Аракан кёпюр» машин ёлдан да оьтюп къарагъан. Телиянгур явгъан сонг ташлар тёгюлюп шо ёлгъа да кёп зарал болгъан. Дулдуг юртлулар да оьзге  ерлеге чыкъмагъа имканлыкъларсыз къалгъан. Буссагьатгъы вакътиде эсгерилген райондагъы кёпюрлени ярашдырып янгыртмакъ учун  таман чакъы адам ва техника гюч бакъдырылгъан. Шонда  юрюлеген ишлени  гелеген жуманы ичинде тамамламагъа гёз алгъа тутулгъан.

 

Н. Б.