Бизде Ватанын якъламакъ гьар эргишини сыйлы борчу болуп токътагъан. Шо борч наслудан наслугъа, атасындан уланына бериле геле. Украина бойда хас асгер гьаракат башланып, Ана-Ватан къоччакъ уланларына чакъырыв этгенде, гьалиден минг йыллар алда йимик, белин бек къысып байлап, къолуна савут алып, ватаныбызны эркинлигин ва харлысызлыгъын якъламакъ учун хыйлы батырларыбыз алгъа чыкъды. Шолайланы арасында хас асгер гьаракат юрюлеген бойда къоччакъ кюйде жан берген адилянгыюртлу 38 йыллыкъ Амир Хасаев де бар эди.
Амир ата-анасы булан бирче 80-нчи йылланы ахырында Ханты-Мансийск Автоном округгъа гёчюп гетген эди. Школаны да ол Нягань шагьарда битдирген. Асгер борчун кютген сонг, загьмат ёлун башлагъан. Уьйленген, тек насиби узакъ сакъланмагъан, айрылгъан. Шондан сонг языву болмагъан буса ярай, дагъы уьйленмеген.
Гетген йыл октябр айны башында Амир Хасаев оьзю учун тюз къарар къабул этген – Ватанны эркинлигин якъламагъа токъташгъан. Бизин уьлкени Савутлу гючлери булан дыгъар да байлап, гёнгюллю кюйде Украинада юрюлюп турагъан хас асгер гьаракатгъа гетген.
2023-нчю йылны 11-нчи ноябринде Донецк Халкъ Республиканы Водяное деген еринде, Оьр Командование оьзлени алдына салгъан масъаланы кютегенде, ол гьайдайгъан БМП душманны атышывуна тюшген. Амир бир абатгъа да артгъа тартылмагъан, игит кюйде жан берген.
Дёрт ай оьтген сонг, бу йылны апрел айыны башында Россияны Оборона Министерлигини «Центр» деген дав бёлюгю Авдеевка бойда Водяное деген юртну къолгъа алгъанны билдирди. Шо операцияда бизин якълы яшлар да жанларын къурбан этгенлер. Оланы токъташдырмакъ учун сюеклери Ростов шагьаргъа йиберилген. Шоланы арасында Амир Хасаев де болгъан.
Амирни сал сюеги уьюндегилеге июль айны ахырында берилди. Кёп адамны ортакъчылыгъы булан арт тынышына ерли Ватаныны алдындагъы борчуна амин болгъан Амир ата юрту Адил Янгыюртда гёмюлдю.
Районну ёлбашчысы Даниял Исламов Амирни ювукъ адамларына теренден къайгъырышывун билдирди.
«Адилянгыюртлу 38 йыллыкъ Амир Дагьирович Хасаев хас асгер гьаракат юрюлеген ерде аслу масъаланы чечегенде къоччакъ кюйде жан бергенин юрегимде пашманлыкъ булан эсгеремен. Гьюрметли Дагьир Анварович ва Райса Мухтаровна, Амирни къардаш-къурдашы! Сизин уланыгъыз парахат яшавубузну якълап азиз жанын къурбан этген. Бу къыйынлы гюнюгюзде сизге гьакъ юрекден къайгъырышаман. Сиз шолай уланны — оьз Ватаныбызны герти патриотун тарбиялагъан саялы баракалламны билдиремен.
Амир бизин уьлкеде парахатлыкъ болсун учун жанын къурбан этген. Савлай район ва Дагъыстан сизин булан бирге бугюн къайгъыра. Амир бизин юреклерибизде даимге къалажакъ», — деди Даниял Исламов.
Хас дав гьаракат юрюлюп турагъан аз заманны ичинде ата юртубуз Адил Янгыюрт оьзюню 8 уланын тас этди. Озокъда, гьар тас этив адамлары учун къайгъы ва пашманлыкъ. Олар оьзлени яшавундан алда Ватаныбызны эркинлигин ва оьсюп гелеген яшланы парахат гележегин артыкъ гёргенлер. Оланы атлары юртлуларыны ва савлай Дагъыстанны халкъларыны юреклеринден бир мюгьлетге де таймажакъ. Ятгъан еригиз ярыкъ болсун, къоччакълар!
Герейхан ГЬАЖИЕВ.
