Артдагъы гюнлерде Бабаюрт районну Люксембург юртунда хас асгер гьаракатны ортакъчысы Шарабдин Алтавовну юртлулары уллу сююнч булан къаршыладылар. Ол хас асгер гьаракатны барышында алдына салынгъан масъалаланы чечегенде душманны атышывуна тюшюп, авур яралангъан эди. Хыйлы заман госпитальда яраларын сав этди. Гьали буса ата-анасыны, ювукъ адамларыны янына, уьюне къайтды.
Шатлы чара юртдагъы агротехнология лицейде оьтгерилди ва онда районну асгер комиссары Даниял Дибиров, муаллимлер, охувчу яшлар ва асгер къуллукъчуну къардаш-досу ва ювукъ адамлары жыйылгъан эдилер.
Шарабдин Алтавов 2019-нчу йылда ата юртундагъы лицейни битдирип, Москвадагъы асгер училищеге охумагъа тюшген эди. Охув ожакъда гетген биринчи гюнден тутуп да Шарабдин муаллимлер ва бирче охуйгъан ёлдашлары булан ортакъ тил таба, оланы алдында абур къазана. Шарабдин оьзюн исси сёзлю, таза юрекли улан гьисапда танытмагъа бажара.
Училищени Ш. Алтавов лейтенант чин булан битдирип, оьр асгер ва ватандашлыкъ билимлеге ес болгъан. Охуйгъан заманында Шарабдин Къызыл майданда оьтгерилеген парадда эки керен ортакъчылыкъ этген ва «Уьстюнлюкню парадында ортакъчылыкъ этгени саялы» деген медальгъа лайыкълы болгъан.
Охувун тамамлагъан сонг Ш. Алтавов Забайкалье бойдагъы Борзя деген шагьаргъа бакъдырыла. Онда ол оьзюню алдына салынгъан масъалаланы уьстюнлю кюйде кюте, командирлени ва асгер ёлдашдарыны алдында яхшы якъдан таныла.
2023-нчю йылны ноябрь айындан берли Шарабдин Алтавов Украина бойда, Луганск ва Донецк Халкъ Республикаларында юрюлеген хас асгер гьаракатда айры масъалаланы чечип тургъан. Ватаныбызны алдында токътагъан тапшурувланы чечивде гёрсетген къоччакълыгъы ва гьаракаты саялы ол Россия Федерацияны оьр пачалыкъ савгъатларына гёрсетилген.
Шатлы чарада Бабаюрт районну асгер комиссары Даниял Дибиров жыйылгъанланы алдында сёйлей туруп, люксембурглулар Шарабдин Алтавов йимик юртлулары булан оьктем болма герекни эсгерди.
«Бугюн къолунда савуту да булан Ватанны якълайгъанлагъа уьйлерине эсен-аман къайтма насип болсун, оланы ата-анасыны гёзлеринде шатлы гёзьяшлар болсун», — деп ёрады, оьзюню сёйлевюню ахырында ол.
Ёравлардан ва алгъышлардан сонг, Шарабдин Алтавов ва ону ювукъ адамлары шатлы чараны оьтгергенлеге гьакъ юрекден баракалласын билдирди.
Бугюнлерде Бабаюрт райондан Украинаны миллетчилерине къаршы 300-ден артыкъ къоччакъ гьазир тургъанны эсгермеге сюемен. Оланы кёбюсю пачалыкъ савгъатлагъа ес болгъанлар ва Ватанына уьстюнлюк алып къайтмагъа умутлулар.
Герейхан ГЬАЖИЕВ.
