Белгили болгъаны йимик спортну къайсы журасында болса да гёрмекли уьстюнлюкге етишмек учун кёп къыйын-тер тёкмеге тюше. Бу ишде гьар спортчу юрегине мурат тутуп, къаныгъывлу кюйде шо мурадымны яшавгъа чыгъармайлы къойман деп айтып, къайратлы кюйде чалышма борчлу.

Капир Къумукъ юртда тувуп оьсген, билим алгъан ябушувну грек-рим журасы булан машгъул болагъан Даниял Агъаев шолай тавакеллиги бар кочаплардан. Бираз алларда ол оьзюню къасты, гьаракаты  булан Азербайжанда юрюлген Европада биринчилик учунгъу ярышларда алтын медаль къазанып къайтды.

Буссагьатгъы вакътиде Даниял Москвада Россияны жыйым командасы булан бирге август айны ахырларында Новосибирск шагьарда оьтгерилежек «Совет Союзну Игити А.М.Аксёновну мемориалы» деген Халкъара турнирде ортакъчылыкъ этме гьазирлик гёрюп тура. Биз де чартлап гетме турагъан чакъматаш йимик къатты ругьу булангъы улан Даниялгъа гьар-бир ишинде янгы оьрлюклер ёрайбыз.

 

 Казим КЪАГЬРУМАН.

СУРАТДА: Даниял АГЪАЕВ.