Бизин къумукъ улан, къошулчан ябушувланы айтылгъан устасы Магьаммат Мокаев 2000-нчи йылны июль айыны 30-нда Буйнакск шагьарда тувгъан. Ол яш чагъынданокъ да тутушуп ябушувну журалары булан иштагьлы кюйде машгъул болгъан. 12 йыллыкъ чагъында ата-анасы булан бирге Англиягъа гетип, Манчестер шагьарда яшама башлагъан.
Англияда Магьаммат спортну къошулчан ябушув къайдалары булан мекенли кюйде машгъул бола. 2015-нчи йылны ноябр айында Джейк Хитон булан оьтгерген тутушувну да ол биринчи тиретинде утма бажаргъан. Шондан сонг оьтген беш йылны ичинде Магьаммат Мокаев 23 тутушувда ортакъчылыкъ этген ва бирисинде де утдурмагъан. 2018-2019-нчу йылларда ол ябушувланы ММА журасындан дюньяны чемпиону деген атны къазанма бажаргъан.
2020-нчы йылны август айындан башлап, М. Мокаев спорт яшавунда мекенли токъташгъан усталар булан тогъатартма башлай. Шо йыл ол Гленн Маквейден уьст геле, 1922-нчи йылны март айында Коди Дерден булангъы ябушувну да биринчи тутушувданокъ уьстюнлю кюйде тамамлама бажаргъан. Шо йылны ичинде ол дагъы да эки тогъатартывну оьз пайдасына тамамлагъан.
2023-нчю йыл Магьаммат Жафэл Фильодан уьст гелген, 2024-нчю йылны март айында Алекс Перес булангъы тутушувну утгъан. Касбучу кочапланы арасында оьтгерилген тогъатартывланы 13-сюн оьр даражада оьтгерип, М. Мокаев, тавакелли тав йыгъар дегенлей, гьалиге ерли бир тутушувну да утдурмай канзиден канзиге инамлы кюйде гётериле бара.
Казим КАЗИМОВ.
СУРАТДА: Магьаммат МОКАЕВ.
