Артдагъы йыллар дагъыстанлылар лап бек сюеген спортну тутушуп ябушув журасында Къаягент район­ну кочаплары етишеген уьстюнлюклер гьар кимни де тамашагъа къалдыра. Янгыз бу йыл  ерли кочаплар  оьмюр­ оьлчевлерине гёре, гиччилеринден уллуларына ерли кёп оьрлюклеге гётерилмеге бажардылар.

Айтагъаным, 15 йыл битмегенлени арасында Зугьум Арслангереев (38 кило), Агьмат Ибрагьимов (62 кило), Багьавутдин Алибеков (75 кило) Россия ярышларында гюмюш медаллагъа ес болдулар. Артдагъысы Европа ярышларында да ортакъчылыкъ этди.

18 йыл битмеген яшёрюмлени арасында болгъан Россия ярышларында Къаягент юртлу Арслан Мирзаев 2-нчи канзиге гётерилмеге бажарды. Тек, буланы барындан да гьусемегентли дюньяны чемпиону Ибрагьим Къадиев озмагъа болду. Ол июн айны орталарында Грозный шагьарда тенглилерини арасында юрюлген Россия ярышларында биринчи ерни къазанды. Арадан бир жума оьтюп Ибрагьим уллуланы  арасында Олимпиаданы алдында Россияны олимпия командасын къурувгъа байлавлу оьтгерилген Россия чемпионатында да ортакъчылыкъ этмеге ва биринчи болмагъа бажарды.

Июнну 28-30-нчу гюнлеринде Сербияны Нови-Сад деген шагьарында оьзлеге 18 йыл битмеген яшёрюмлени арасында Европа ярышлары оьтгерилди. Шоларда уьстде айтылгъан къаягентли кочап Арслан Мирзаев де ортакъчылыкъ этди. Ол эки гюнню узагъында халчагъа 6 керен чыкъды. Бизин яш башлап Словакияны, Украинаны, Францияны, Туркияны вакиллерин утду. Молдавиялы кочап Каталин Спину булангъы ябушув Арслан учун енгиллерден болмады. Ёлугъув 4:4 санавлар булан битсе де, уьс­тюнлюк бизин  кочапгъа берилди.

Озокъда, булай натижалар оьзлюгюнден гелмей. Гьар ярышлагъа гьазирленив нечесе гюнлеге, айлагъа, йыллагъа узатыла.

— Къаягент районлу яш­ланы уьстюнлюклери, — деди бизин булангъы лакъырлашывунда тутушуп ябушувдан халкъара судьясы Гьюсейн Гьасанов, — ерли тренерлени кёп йыллыкъ халчада гьаракат этип чалышывуна кюрчюлене. Къаягентлилер гьали айтылгъан Хасавюрт, Магьачкъала шагьарлы кочаплар булан бир даражада. Шо бизин барыбызны да къувандыра.

Тутушуп ябушув ерли тренерлени гьаракаты булан оьсювню ёлунда. Гёрмекли уьстюнлюклерде тренерлер Зубайругьажи Керимхановну, Магьамматзагьир Керимхановну, Абдулжалил Шагьбановну, Алберт Магьамматовну, Ратмир Мирзаевни, Расул Магьамматовну, Магьаммат Алиевни аслам пайы бар.

 

Магьамматрасул ИБРАГЬИМОВ,

Къаягент район.