Оьтген жумагюн Францияны тахшагьары Парижде гезикли XXXIII-нчю язлыкъ Олимпия оюнлар башланды. Тек шондан алда да, ачыкълашдырып айтгъанда, июль айны 24-нден тутуп, спортну регби, футбол, гандбол, окъжая атыв йимик жураларындан ярышланы башлапгъы тиретлери юрюлген.
Белгили экени йимик, Франция Олимпия оюнланы уьчюнчюлей къабул этегени гьакъда айрыча эсгермеге тюше. Демек, гьалиден къайры да, Францияда Олимпия оюнлар 1900-нчю, 1924-нчю йылларда оьтгерилген. Дёрт йылда бир болагъан шо агьамиятлы ярышланы барышында спортну брейкинг журасы булан машгъул болагъанлар бу гезик биринчилей медаллагъа ес болмакъ учун тогъатартажакълар.
Олимпия оюнланы барышында оьтгерилеген ярышларда 208 пачалыкъдан гелген спортчулар медаллагъа ес болмакъ учун оьзлени бажарывлугъун ва усталыгъын гёрсетежек. Шону булан бирге, чыдамлыгъын, къыйынлыкъланы алдында къайпанмайгъанын исбатлажакъ. Олимпия оюнланы къурувчулары билдирегени йимик, спортчулар спортну 32 тюрлю журасындан тагъатартажакъ. Олагъа 329 алтын, гюмюш ва бронза медаллар тапшурулажакъ.
Олимпия оюнланы барышында оьтгерилеген ярышларда россиялы спортчулар да бар. Оланы бирлери оьзге тыш уьлкелер учун тогъатартажакъ. Бизин спортчуланы кёплери шо оюнларда ортакъчалыкъ этивюн инкар этген. Шо да Олимпия халкъара комитети 2023-нчю йылны декабр айны 8-нде къабул этген россиялы спортчуланы ихтиярларын къыйыкъсытагъан къарар булан байлавлу. Неге тюгюл, гезикли Олимпия оюнланы вакътисинде алдынлыкъ алгъан россиялы спортчуланы гьюрметине бизин уьлкени гимни согъулмажакъ, олай да байрагъы гётерилмежек. Шондан къайры да, оьрде эсгерилген халкъара къурумуну къарарында бизин уьлкеге байлавлу дагъы да кёп тюрлю гери урувлар тасдыкъ этилген.
Шо гьакъда айта туруп, федерал оьлчевюнде иш гёреген федерал телерадио-компаниялар франциядагъы Олимпия оюнланы вакътисинде юрюлеген ярышланы бирисин де гёрсетмейгени гьакъда да айрыча эсгермеге тюше.
Н. БАЙБОЛАТОВ.
