Бабаюрт районну ёлбашчысы Даниял Исламов Герменчик юртну халкъы булан  ёлугъув оьтгерди. Онда юртлулар савлукъ сакълав, билим берив, электрик гюч ва ичеген сув булан юртлуланы таъмин этив, маданият къаланы уллу ремонт ишлерине байлавлу ва оьзге тюрлю масъалаланы арагъа салдылар.

– Булай ёлугъувлар районну бары да юртларында оьтгерилежек. Мен ойлашагъан кюйде, олай болса, юртну халкъы учун, оьзлени масъалаларын билдирмеге, ойларын айтып пикирлешмеге имканлыкъ тувулуна. Биз де шоланы яшавгъа чыгъа­рывда оьзюбюзню къолубуздан гелеген бары да кёмегибизни этмеге къасткъылажакъбыз, – дей, халкъны соравларына жавап бере туруп, Даниял Исламов.

Ёлугъув ачыкъ ва инамлы гьалда оьтгерилди.

– Озокъда, бары да эсгерилген чакъы масъалалар бир аз заманны ичинде чечилип къалмажакъ, огъар­ заман да, харж да герек, юрт гьакимлер де шо ишге оьзлени бары да гючюн салажакъгъа да инанаман. Гертисин айтсакъ, сиз юрт башчыгъыз Магьач Батырханов булан да тюзелгенсиз. Бирдагъы бир район жыйы­ныны депутаты Муса Умахановну да юртуну халкъы учун юреги авруй. Шону учун да бугюн арагъа салынгъан масъалаланы барысын да яшавгъа чыгъармагъа бажарылмаса да, кёбюсюне къаралажакъ, биринчилей, озокъда, фельдшер-акушер пункту ачылып ишлеме герек, – деди Д. Исламов.

Ёлугъувдан сонг, юрт администрацияны бинасында юртлуланы хас масъалалары булан   къабул этген сонг, Д. Исламов олагъа барысына да исбатлы жаваплар берди.

Ондан сонг районну башы фельдшер-акушер пунктуна барып, медицина къуллукъчулар булан ёлугъуп лакъырлашды. Олар оьз гезигинде, оьтген девюрню 60-нчы йылларында къурулгъан, гьар гюн дегенлей бузулуп турагъан медпунктда аврувланы къоркъунчлу гьалда къабул этме тюшегенни гьакъында айтдылар.

–  «Савлукъ сакълав» деген милли проектине гирген янгы савлукъ сакълав идараны къурулушу 2025-нчи йылда башланажакъ деп гёз алгъа тутулгъан. Янгы ФАП-ны къурулушу эрте заманны ичинде башлансын учун, шо масъаланы оьзюмню тергевюмню тюбюнде сакълажакъман, – деди Д. Исламов.

Юртну халкъы Даниял Исламовгъа ёлугъув оьтгергени ва юртлуланы хас масъалаларына да тергев бергени саялы баракалла билдире туруп, районлулар учун этеген къастлы ишлеринде уьс­тюнлюклер ёрадылар.

Шолай ёлугъув Хамаматюртда да оьтгерилди. Ёлугъувда Хамаматюрт администрацияны башы Амир Къазанбиев, депутатланы юрт жыйыныны ёлбашчысы Сайида Бекмурзаева, депутатлар Бабаюрт район электросетни ёлбашчысы Гьажи Гьажиев, муаллимлер ва оьзгелер де ортакъчылыкъ этдилер.

Жыйынны барышында, юртну халкъы тергевге ва районну ёлбашчыларыны янындан кёмек гёрсетилме тийишли, биринчи электрик гючню янгы кюйде къурувну гьакъында ва сув масъалаланы арагъа салды. Оьз гезигинде Даниял Исламов жыйылгъанлагъа маъналы жаваплар берди.

– Биз бугюн сизин яшав гьалыгъызны билип, тувулунгъан масъалаланы арагъа салып пикирлешмек муратда гелгенбиз. Юртну ёлбашчылары ва халкъ булан биригип аралыкъ тутуп иш гёрме де къаражакъбыз. Гьар адамны пикрусуна да айрыча къаралажакъ, – деди районну башы.

Юртлуланы айры соравларына жавап бермек муратда, районну башы юрт администрацияны бинасында адамланы къабул этди. Оланы арасында юртлу Жамиля Алхазова уьюне газ тартмакъ учун Даниял Исламовгъа кёмеклешмекни тиледи. Шо масъаланы районну башы оьзюню тергевюню тюбюнде сакълажакъны гьакъында билдирди.

Ери гелгенде, август айны ортасы болгъанча районну бары да юртларында шолай ёлугъувлар оьтгерилме гёз алгъа тутулгъанны эсгермеге сюе­биз.

 

Герейхан ГЬАЖИЕВ,

бизин мухбирибиз.

 

СУРАТЛАРДА: ёлугъувланы барышы.