Бу дюньяда бары насипни башы агьлю болуп токътай. Эки сюйген бир болуп нечик ожакъ къурса, оланы авлетлери де шолай насипли болмагъа талпына. Агьлюде адам тарбиялана, яхшы къылыкълар ала. Шо саялы да агьлю гьар даим алда токътама герек.
Бу йыл бизин уьлкебизде Агьлюню йылы деп белгиленген. Бабаюрт районда шогъар багъышланып кёп агьвалатлар оьтгерилди: бирге узакъ оьмюр сюргенлеге гьюрмет этилди, оланы «Сюювню ва аминликни» медалы булан савгъатладылар. Олай белги буса кимге де берилмей, уьлгюлю агьлюлеге бериле.
Шолай татывлу агьлю булан газетни охувчуларын таныш этме сюебиз.
Ваха ва Райиса Мурзаевлер бирге яшайгъанлы 50 йыл бола. Шо вакътини ичинде оланы арасында бир де хатиржанлыкъ болмагъан. Оланы бир-бирине къысмат оьзю табушдургъан. Ваха ювугъу булан больницагъа гелгенде, онда медсестра болуп ишлейген Райисаны гёре ва ушатып къоя. Ону сюегенин биревге де айтмайлы, хыйлы заман тура. Артда да Райисагъа билдире ва 1974-нчю йыл олар уьйлене.
1975-нчи йыл олагъа къыз, сонг буса 2 улан да тува. Ваха ва Райиса оьзлени оьз къыйыны булан уьйлер де къуруп, яшларын асил къылыкъларда да тарбиялап, олагъа билимлер де берип, тюз ёллагъа салгъан. Бугюнлерде оланы авлетлери гьариси оьз ерин тапгъан. Олар оьзлер кёп сююп танглагъан касбуларына гёре загьмат тёгелер.
Ваха да, Райиса да буса оьзлер къургъан ожагъында авлетлерини яшларындан къуванып яшайлар. Ваха кёп йылланы узагъында транспорт къурумда шофёр болуп, сонг да районда гьар тюрлю тармакъларда да чалышгъан сонг, пенсияда, уьйде ял ала. Райиса буса кёп сююп танглагъан касбусундан айырылып болмайлы, гьали де больницада ишлей.
Бу агьлюге сукъланмайлы къарап болмайсан, неге тюгюл эрини аркъатаяву къатыны, бир-бирини гёнгюндегин гёзюне къарап билелер ва исси сёйлеп бир-бирини гёнгюн ачалар. Шолай уьлгюлю агьлюлер бизин районда кёп болса, уьлкебиз шатлыкъдан яшнажакъ.
Гёзел ГЬАСАНОВА,
Бабаюрт
СУРАТДА: Ваха ва Райиса Мурзаевлер.
