Алдагъы гюнлерде Самара областда «iволга» деген жагьиллени Бютюнроссия форуму юрюлген. Шо форумну оьлчевюнде бизин уьлкени бары да дегенлей ерлеринден гелген орта билим берив охув ожакъларыны ёлбашчыларыны 100-ден де артыкъ тарбиялав масъалалагъа къарайгъан насигьатчылары «Тарбиялавну усталары» деген гьаракатда оьзлени ортакъчылыгъын болдургъан. Оланы арасында бизин республиканы шагьарларында ва юртларында иш гёреген школаларда чалышагъан яш касбучулар да болгъан.

 

Торайып гелеген наслуну тарбиялавда топлангъан сынавну малим этмек оьрде эсгерилеген шо форумну алдына салынгъан аслу  борчлардан гьисаплангъан. Ачыкълашдырып айтгъанда, сынавлу муаллимлер узакъ йылланы боюнда топлап амалгъа гелген бажарывлугъун ва усталыгъыны сырларын яш касбучулагъа ачыкъ этген.

Оьзлени гезигинде, яш касбучулагъа охувчу яшланы ва  студентлени  муратгъа къыйышывлу этип, тийишли кюйде  тарбияламакъ учун  не къадар иш юрютегенин жыйылгъанлагъа таныш этмек учун имканлыкълар берилген. Шону булан бирге олагъа яшланы тарбиялав тармакъда артдагъы вакътилерде арагъа чыгъып, къолланып турагъан къайдалагъа тюшюнмеге шартлар яратылгъан.

 

Н. БИЙБОЛАТОВ.