Къызлар шагьарда ва районда гьалиги заманда агьамиятлы инвестиция проектлер яшавгъа чыгъарылагъаны тергевню тартмай болмай.
Гьали-гьалилерде эсгерилген бойда Дагъыстанны Гьукуматыны Председатели Абдулмуслим Абдулмуслимовну ва шолай да регионну тармакъ министерликлерини башчыларыны ортакъчылыкъ этивю булан агьамиятлы проектлерин яшавгъа чыгъарывуну айланасында уллу гьакълашыв генгеш оьтгерилди.
Генгешде Дагъыстанны юрт хозяйство ва сурсат, табиат байлыкъларыны министерликлери булан байлавлукъда «Дагводресурсы», «Главрыбвод», Гюнбатыш-Каспий сув бассейн управлениесини жаваплы къуллукъчулары да арагъа салынгъан агьамиятлы масъалагъа гёре оьз пикруларын аян этди.
«Аччыкёл гьавчулукъ хозяйство» деген ихтиярлары дазуландырылгъан акционер жамиятны (ООО) сиптечилиги булан пайдаландырылагъан агьамиятлы проектлени оьлчевюнде токъташдырылгъан борчланы белгиленген болжалланы ичинде яшавгъа чыгъарма тарыкъ. Шону учун юрюлеген чаралар толу кюйде эсгерилди.
– Россияны ва регионну башчыларыны янындан артдагъы вакътилерде ич туризмни имканлыкъларын толу кюйде пайдаландырывгъа тергев артып тербейгени англашыла, – деди Абдулмуслим Мугьутдинович. – Биринчи проектге гёре Къызларда ял алыв базаны къурулушун 2027-нчи йылда тамамлап пайдаландырывгъа бермеге умут этилине. Маячыны янындан шогъар 151 миллион манат акъча маялар айырылгъан. Ломай харжланы тёкмей-чачмай тутумлу кюйде къолламагъа таклиф этилине. Неге десегиз, шо юзлер булангъы адамланы ишге къуршамагъа кёмек этежек. Уьстевюне, йылда республика бюджетге де шондан 82 миллион манатны оьлчевюндеги налог гелимлер къаравуллана.
Экинчи проект, балыкъчылыкъ тармакъны имканлыкъларын асувлу кюйде къоллавну гьисапгъа алып къурулгъан ва 2028-нчи йылда яшавгъа чыгъарылмагъа герек. Балыкъны ишлетеген предприятиелени къурув, озокъда, балыкъ байлыкъларыбызны асувлу кюйде къоллавгъа бакъдырылгъан. Шо да янгы иш ерлени ачмагъа, налог гелимлени артдырмагъа имканлыкълар яратажагъы шекликни тувдурмай. Айтмагъа сюегеним, балыкъ байлыкъларыбызны талавургъа салмай артдырмакъ учун оьсдюрмеге де тарыкъ.
Белгили болгъаны йимик, балыкъчылыкъ комплексини имканлыкъларын асувлу кюйде пайдаландырывгъа бакъдырылгъан проект учун маячыны янындан 250 миллион манат харж айырылгъан. Шо да Дагъыстанны темиркъазыкъ боюнда яшайгъанланы ва шолай да ял алмагъа гелеген къонакъланы, сурсат аманлыгъын болдурувгъа, демек, туризмни оьсдюрювге кёмек этежеги шекликни тувдурмай.
Генгешни ортакъчылары болгъан гьакълашывланы натижасында тувулунгъан пикруланы жамын чыгъарды, пайдалы таклифлерин бир гёнгюлден якълады.
Къ. КЪАЗАКЪМУРЗАЕВ.
