Яйлыкъ каникулланы вакътисинде бизин республикабызны бары да районларындагъы лагерлер ял алагъан яшланы къабул этип тура. Яшланы къабул этмеге гьазир тюгюл бир-бир лагерлер тергевлени натижасында ишлетмеге ихтияр берилмегенге гёре, бирдокъда ачылмай къалгъан. Шолайлыкъда, яшлагъа узакъгъа унутулмайгъан кюйде заманны таъсирли оьтгермек учун шартлар яратылгъан.
Къарабудагъгент районда да яшланы ял алыв яйлыкъ лагерлери аз тюгюл. Шону гьисапгъа алып, эсгерилген районну администрациясыны яшавлукъ масъалалагъа ва яшёрюмлени ишлерине къарайгъан бёлюгюню ёлбашчысы Насибат Алхасова булан ёлугъуп, лагерлени ишлерини гьалын сорап лакъырлашдым.
Ону сёзлерине гере, яй айларда яшланы ял алывуна Къарабудагъгент районда гьар заманда да таман чакъы агьамият берилип гелген. Торайып гелеген яшланы ва оьрюм чагъындагъы уланланы ва къызланы ял алывун къурумлу кюйде оьтгеривге савлай уьлкени оьлчевюнде де инг аслу яшавлукъ масъалаланы бирисине йимик янашыв бар экенин айтгъанда, шо ишни маънасы да англашылмай къалмай.
Къарабудагъгент районну гьакимлик къурумларыны жаваплы къуллукъчулары да яшланы ял алыв яйлыкъ лагерлеринде не къадар иш юрюлегенин оьзлени тергевюню тюбюнде сакълай. Ачыкълашдырып айтгъанда, шо ишге район администрациясыны яшавлукъ масъалалагъа ва яшёрюмлерини ишлерине къарайгъанбёлюгюню, билим берив управлениесини касбучулары таман чакъы даражада къуршалгъан. Жумадан-жумагъа мердешленген кюйде, оьтгерилеген район администрациясыны аппаратыны генгешлерини барышында яшланы яй айларда ял алывуну масъаласына къаралагъаны да шону герти кюйде исбатлай. Оьзлени уьюнден, гьар заманда да гьайлы янашагъан ата-анасындан, орамда бирче оюнлагъа къарышагъан къурдашларындан арекге чыгъып, ял алыв лагерлеге гелген яшланы аманлыгъын болдурувгъа Къарабудагъгент районну ич ишлер бёлюгюню къулукъчулары да шайлы къошумун эте.
Нечик алай да, торайып гелеген наслуну вакиллерини савлугъун беклешдирмек, оланы яратывчулукъ гьаракатгъа гёнгюллю этип, гьар тюрлю саниятлагъа бакъгъан якъдагъы пагьмусун ачмакъ, яшланы ял алыв лагерлери яшавгъа чыгъармагъа тюшеген аслу борчлардан болуп токътай. Шону булан бирге, яшланы ял алыв лагерлерини къуллукъчулары гьар гюн сайын дегенлей оьтгереген гьар тюрлю гьаракатлар оланы хасиятына эл арада, халкъ арада макъталып гелген инг де асил къылыкъланы сингдирип тарбияламакъ, олай да, спортну гьар тюрлю журалары булан машгъул болуп, санлы яшав юрютмеге иштагьландырмагъа болушлукъ этип геле.
Озокъда, артдагъы уьч йылны боюнда болуп турагъан агьвалатлар гёз алгъа тутулуп, яшланы ял алыв лагерлеринде патриот ругьда тарбиялавгъа байлавлу да мекенли иш юрюлегени гьакъда айтмагъа бажарыла.
– Сиз де билеген кюйде, бизин районда иш гёреген яшланы ял алыв яйлыкъ лагерлери аслу гьалда денгиз бойда, олай да юрт ягъаларда, таза гьавасы булангъы табиатны инг де гёзел ерлеринде ерлешген,– деп узата оьзюню сёйлевюн мени булангъы лакъырыны вакътисинде Насибат Алхасова. – Демек, «Солнечный берег» деген яшланы республика центры ва «Анжи-Мастер», «Аист» деген ял алыв лагерлери денгиз бойда гьалиги талаплагъа жавап береген биналарда иш гёре. Шолардан къайры да, бизин районнну юртларыны ягъасында ерлешген дагъы да 22 де яйлыкъ лагерлерине ял алмагъа гелеген яшланы санаву йылдан-йылгъа артып тура. Неге тюгюл, шолар барысы да ял алыв лагерлерини республика сиягьларына гирген.
Шолайлыкъда, янгыз Къарабудагъгент райондан тюгюл, бизин республиканы оьзге тавтюп бойларында ерлешген юртларындан ва шагьарларындан гелген яшлагъа да 21 гюнню узагъында ял алмагъа имканлыкълар яратылгъан. Оьрде эсгерилген лагерлени гьарисинде бир сменде ял алагъан яшланы санаву 300-ден 360-гъа ерли етише. Ватандашланы пачалыкъ ва муниципал къуллукъларын кютеген кёп тармакълы центрлардан таба шо лагерлеге путёвкаланы артыкъ аваралар этмейли алмагъа бажарыла. Шондан къайры да, Дагъыс-танны билим беривге ва илмугъа къарайгъан министрлигини янындан да яшланы ял алыв яйлыкъ лагерлерине къошум путёвкалар да гёрсетиле.
Шо гьакъда айта туруп, бу йыл да, яшланы яйлыкъ лагерлеге бакъдыра туруп, инг башлап яшав гьаллары осал уьягьлюлерде тарбияланагъан яшлагъа тергев бермеге къаст этилгенин айрыча эсгермеге тюше. Къарабудагъгент районну администрациясыны яшавлукъ масъалалагъа ва яшёрюмлерини ишлерине къарайгъан бёлюгюню ёлбашчысы билдиргени йимик, Украина бойда юрюлеген хас асгер гьаракатгъа къуршалгъанланы авлетлери де ял алыв лагерлеге биринчилерден йибериле.
Украина булангъы дазу бойдагъы Белгород, Курск областлардан, олай да Луганск, Донецк областлардан гелген уланлар да, къызлар да бизде асрулар боюнда юрюле гелеген къонакълыкъ мердешлени сезмеге болар йимик къабул этиле. Йыракъдан гелген яшлагъа Къарабудагъгент районну гьакимлик къурумларындан къайры да, Дагъыстанны билим беривге ва илмугъа къарайгъан министри Ягьия Бучаев, ону биринчи заместители Айида Далгатова, олай да эсгерилген министерликни къошум билим беривге къарайгъан бёлюгюню касбучулары да гьайлы янашывун болдура.
Лагерлерде гьар тюрлю яратывчу ишлер, гьар смена учун маданият, спорт чаралар, конкурслар да юрюле. Дербентдеги къалагъа ва Солакъ гьавузгъа, бизин республиканы оьзге танывлу, белгили ерлерине бармагъа сапаргъа чыгъа. Къарабудагъгент районгъа яй айларда гелегенден къайры, юртлу яшлар ял алмагъа тышгъа да бара. Шолай, лагерлени биринчи сменинде Къарабудагьгент райондан тышда ял да алып, савлугъун да беклешдирип 100-ге ювукъ яш гелген.
Умуми айтгъанда буса, Къарабудагъгент районда ерлешген лагерлеге яшланы ял алмагъа йибермеге ярай. Оланы ойлап, ата-анасына талчыкъмагъа бир тюрлю себеп де ёкъ. Эгер де бир-бир онгайсызлыкълар болса да, бир ай да гетмейли гене де охувгъа гиришежек уланлагъа ва къызлагъа шоларда арадан заман оьтгенде эсге алардай сююнчлю мюгьлетлер болажакъгъа шек де ёкъ.
Н. БАЙБОЛАТОВ.
