Бизин республикада яшавгъа чыгъарылагъан 81 проект «Бизин къошум» деген милли савгъатгъа лайыкълы болгъан. Бу савгъат бизнес ва алыш-бериш булан машгъул тюгюл къурумлары милли проектлени яшавгъа чыгъарагъаны учун бериле.
Уьстюн гелгенлени савгъатлав РФ-ни Гьукуматыны Координация центрында оьтгерилген. Шонда РФ-ни Гьукуматыны Председателини заместители Александр Новак, федерал къурумланы ва гьакимиятны вакиллери жамият къурумлар булан бирче ортакъчылыкъ этген.
«Агьлюню якълав» деген еттинчи хас номинацияда агьлюню йылында оьтгерилеген гьаракатлар айрыча эсгерилген. Савлай уьлкебизден проектде ортакъчылыкъ этмек учун РФ-ни янгы регионларын да къошуп 632 арза берилген болгъан. 509 проект яшавгъа чыгъарылгъан. Шоланы арасында бизин республикадан 48 къурум милли проектлени яшавгъа чыгъара туруп оьзлени гьаракаты оьрде эсгерилген савгъатгъа лайыкълы болгъан. Финалгъа чыкъгъан бизин республиканы бары да къурумлары хас даражагъа ес болгъан.
2021-нчи йылдан берли савгъатгъа лайыкълы болмакъ учун бу проектде ортакъчылыкъ этеген къурумланы санаву уьч керенге артгъан.
Гьар тюрлю къурумлар яшавгъа чыгъарма гьаракат этеген «Билим берив», «Демография» ва «Экология». Бу тармакълардагъы милли проектлени яшавгъа чыгъарыв 4 керенге артгъан. Дагъы да «Туризм», «Илму» ва «Савлукъ сакълав» деген тармакълагъа да гюнден-гюн гьар тюрлю къурумланы тергевю арта.
Я.БИЙДУЛЛАЕВ
СУРАТДА: финалгъа чыкъгъанлар эсделикге сурат алдыргъан.
