Белгили экени йимик, бу йыл бизин республиканы ял алыв лагерлеринде Белгород ва Запорож областлардан гелген 400 яш ял ала. Шолай, «Аист», «Солнечный берег», «Анжи-мастер» ва «Надежда» деген лагерлерде ял алагъан къонакъ яшлар учун туризмни ва халкъ саниятчылыкъны министерлиги дагъыстанлы усталаны лагерлеге йиберип, мастер-класлар оьтгерген.

Бир жуманы узагъын­да дагъыстанлы усталар къонакъ яшлагъа керамикадан этилеген балхар алатланы, саз балчыкъдан савут-саба нечик этегенин гёрсетип тургъан. Яшлар да бек муштарлы кюйде усталаны кёмеги булан шолай алатланы этме уьйренгенлер. Унцукулдан гелген усталар да олагъа оьзлер этеген алатланы гёрсетген ва уьйренме сюегенлери бу­лан  лакъыр­ этген, насигьатлар берген.

Белгород ва Запорож областдан гелген яшланы Дагъыстанны тарихи ерлерине экскурсиягъа алып да баргъанлар. Олар шо сапарны бек ушатгъан ва биринден-бири алып дегенлей гёргенлерин ёлдашларына хабарлагъан, чыгъаргъан суратларын гёрсетген.

Я.БИЙБОЛАТОВ

СУРАТДА: яшлар — усталар булан.