Рособрнадзорну ёлбашчысы Анзор Музаев билдиргени йимик, гелеген 2025-нчи йылда да бирикген пачалыкъ экзаменлер тайдырылмажакъ. Ачыкълаш-дырып айтгъанда, орта билим береген охув ожакъланы битдирип чыгъагъан уланланы ва къызланы билимлерини сан янын тергевню къайдаларына бугюн-тангала алмашынывлар этилмеге гёз алгъа тутулмагъан.
Ону сёзлерине гёре, бирикген пачалыкъ экзаменни гери урувну гьакъында гьазирленген законну проектине Россияны Пачалыкъ Думасыны депутатлары бу йылны октябр айы болмай туруп, арагъа салып къарамажакъ. Шондан къайры да, ол билдиргени йимик, бирикген пачалыкъ экзаменни бирден-эки тайдырмагъа бажарылмай. Шолай этилсе, оьр класларда билим алагъан яшлагъа бир тюрлю четимликлер ва онгайсызлыкълар тувулунмагъа бола. Шолай билдирив этген сонг: «Охувчу яшлар шо гьакъда ойлашып турмасынлар, шо масъала тезден чечилген», – деп исбатлагъан оьзюню сёзлерин Анзор Музаев.
Шону булан бирге ол англатгъан кюйде, бирикген пачалыкъ экзаменлени оьтгеривню ёругъуна байлавлу яшавгъа чыкъмагъа тюшеген алмашынывлар, лап азындан айтгъанда, эки йыл алъякъда тасдыкъ этилмеге тюше.
Оьзюню гезигинде бирикген пачалыкъ экзаменни оьтгеривню гери урувну гьакъындагъы законну проектин гьазирлегенлени бириси Пачалыкъ Думаны депутаты Яна Лантратова да шо масъалагъа байлавлу пикрусун малим этген. Ону сёзлерине гёре, кюйге къарагъанда, 2025-нчи йылда бирикген пачалыкъ экзаменлер оьзлени барышына бирдокъда алмашынывлар этилмейли оьтгерилежек. Тек 2026-2027-нчи йылда бирикген пачалыкъ экзаменлени оьтгеривню ёругъуна бир тюрлю алмашынывлар этилмеге бола.
Н. БАЙБОЛАТОВ.
