Россияны Пачалыкъ Думасыны депутаты Солтан Гьамзаев «Маяк» деген федерал радиону мухбири булан оьтгерген лакъырлашывунда бизин уьлкени парламентини язбашгъы сессиясыны гьасиллерине байлавлу оьзюню къаравларын малим этген. Шону булан  бирге, гьар гюнлюк ишинде ол оьзю  не йимик агьамиятлы масъалаланы тергевюню тюбюнде сакълайгъаны гьакъында билдирген. 

Ону сёзлерине гёре, сессия инг тарыкълы законланы къабул этив булан тамамлана. Шоланы арасында адамны къаркъарасын къурч этип хошландырагъан ичкилени гьакъылбалыкъ болмагъан яшёрюмлеге сатывну, олай да наркотиклени реклама этивню гери урувгъа  байлавлу законлар бар.

Ол билдиргени йимик, жагьил адамланы сав­лугъун­ сакълавгъа болушлукъ этеген законланы гьазирлев Пачалыкъ Думаны депутатларыны алдында токътагъан инг аслу ва артыкъ агьамиятлы  масъалалардан бириси гьисаплана. Депутатланы шо гьаракаты Пачалыкъ Думаны Председатели Вячеслав Володинни янындан да гьар заман да якълав таба.

Шондан къайры да, Солтан Гьамзаев  башгъа пачалыкълардан   Россиягъа гёчюп гелеген тыш уьлкени ватандашларына байлавлу законлар гьалиги заманны талапларына жавап бермеге тюшегени гьакъда да эсгерген. Депутатлар  арагъа салып ойлашгъан сонг, электросамокатлар булан пайдаланывну къайдалары да ёрукълашдырылмагъа тарыкъ. Хас ихтияр берилмей туруп, бизин уьлкеден тышгъа гетмеге ярамайгъан­гьакимлик къурумланы жаваплы къуллукъчуларына, депутатлагъа, олай да  сенаторлагъа байлавлу законгъа да алмашынывлар этилмеге тюше. Эгер де, олар билдирмейли тыш пачалыкълагъа чыгъып гетсе, жаваплыкъгъа тартылмагъа тарыкъ. Депутатны пикрусуна гёре, шолай гезиклерде оланы  мандатлары чыгъарылып  алынмагъа тюшедир.

 

Н. Б.