Артдагъы гюнлерде Боснияны ва Герцеговинаны тахшагьары Сараевода 15-16 йыллыкъ яш уланланы арасында оьтгерилген Европаны биринчилиги учунгъу ярышларда Бабаюртдагъы спортшколада Дагъыстан Республиканы ат къазангъан тренери Марат Шихалиевни алдында гьазирленеген агъа-ини Ислам ва Иман Магьамматовлар уьстюнлюк къазанып къайтдылар.

Ярышларда Европаны гьар еринден гелген 370-ден де артыкъ боксер ортакъчылыкъ этген.

50 кило авурлукъдагъы Ислам биринчи ябушувунда 5:0 булан азербайжанлы, экинчи ябушувда буса шо санавлар булан румыниялы ва ирландиялы боксёрланы утгъан сонг, финалгъа чыгъып, эрменили спортчудан да 5:0 булан уьстюн гелип, оьр канзиге гётерилген.

Агъасыны инамлы ёлун 52 кило авурлукъда ябушагъан Иман да давам эте. Биринчи оьчешивде ол тюркден 5:0 санав булан, экинчи ва уьчюнчю ябушувларында италиялы ва ирландиялы боксёрланы да шо санавда утуп, финалгъа чыгъа ва онда молдованлы боксёр булан ёлугъа. Амма, ол да бизин боксёргъа утдура: Иман 5:0 санав булан уьс­тюнлюк къазанып, агъа­сы йимик бирдагъы бир алтын медальгъа ес болуп, районну спорт хазнасына аслам къошумун эте.

Ери гелгенде, артдагъы бир-нече йылны ичинде бабаюртлу тренер Марат Шихалиев тарбиялагъан Россия, Европа ва дюнья оьлчевде оьтгерилеген гьар тюрлю ярышларда уьстюнлюк алып турагъанны эсгермеге сюемен.

 

Герейхан ГЬАЖИЕВ,

бизин мухбирибиз.

СУРАТДА: Ислам ва Иман Магьамматовлар – тренери булан