Дагъыстанны Башчысы Сергей Меликовну тапшурувуна гёре бизин республиканы лагерлеринде ял алмакъ учун Курск шагьардан 200 ва Луганск Халкъ Республикадан 48 яш гелген. Яшлар яйлыкъ каникулларда денгиз бойда ял алсын деп Курск областны губернаторуну тилевю де болгъан. Олар гьали «Аист», «Анжи-мастер», «Солнечный берег» деген лагерлерде ял алажакъ.
Яшланы Дагъыстанны билим-беривге ва илмугъа къарайгъан министри Ягьия Бучаев оьзю министерликни къуллукъчулары да булан къаршылагъан, ял алагъан ерлеге ерли узатгъан.
«Биз Курск област къыйынлы гьалларда экенни билебиз. Яшланы яшавуна да кёп гезиклерде къоркъунчлукъ тува. Шону учун да Курск областны губернаторуну тилевюн кёп сююп къабул этдик. Яшлар ял алсын учун бары да онгайлыкълар болдурулгъан», – деген министр оьзюню сёйлевюнде.
Белгили экени йимик, о гюнлерде республикабыздан толу кюйде ял алып, оьзлени разилигин билдирип, Белгород областдан гелген 310 яш уьйлерине къайтгъан. Олар оьзлени каникулларын Къарабудагъгент районда ерлешген «Солнечный берег» деген лагерде оьтгерген.Къонакъланы кёп сюеген Дагъыстанда олар гьар тюрлю тарихи ерлени гёрюп, тавларда болуп, гьар тюрлю оюнланы ойнап, гюч алып сююне туруп бир-бирине хабарлай гетдилер.
Я.БИЙБОЛАТОВ
СУРАТДА: Я.Бучаев Курскдан гелгенлени къаршылай.
