Бир-бир федерал идаралар аян этеген маълуматлар, лап йымышакъ айтгъанда, тамашагъа къалдыра. Россияны Гьукуматыны янында иш гёреген Финанс институтну касбучулары билдиреген кюйде, Магьачкъала бу йылны алты айыны гьасиллерине гёре, уьлкени сан янлы яшаву булангъы шагьарларыны ал сыдраларына къошулгъан.
Санавлар булан эсгергенде, гьюрметли 4-нчю ерде токътагъан. Натижалар адамланы алапаларына, турагъан ерини, жамият транспортну, билим берив ва медицина тармакъланы, экологияны гьалына гёре чыгъарылгъан болгъан. Институтну алимлерине инанса, Дагъыстанны тахшагьарында ватандашланы янындан шо тармакълагъа кант этегенлер айрокъда аз. Сайки масъала, адамланы аслам яны гьалиги яшав шартларына толу кюйде рази.
Тюзюн айтгъанда, институтну билдиривюнде кимлерден сорав алгъаны, нечик ахтаргъаны эсгерилмей. Къарагъанда жавап бергенлени арасында бири де уьйлеринде сувлар, ярыкълар къайтмай, тыгъылып толгъан тыгъыс маршурткагъа минмей, сагьатлар булан поликлиникаларда токътамай, нас суву булангъы денгизде киринмей, чёп тёбелерден гелеген ийисни сезмей…Къайсын-бирисин айтарсан.
Алав АЛИЕВ.
