Бугюнлерде ким буса да бирев айтып да тюгюл, сан янлы билимлеге ес болмай туруп, яшавда алгъа абат алмагъа бажарылмайгъанын англап, кёбюсю уланлар ва къызлар лап яш чагъындан тутуп билим алывгъа яхшы тергев берип геле.
Шолай, мен оьзюню гьакъында айтагъан Шугьанэт Алимурзаева да Магьачкъала шагьардагъы 39 номерли лицейни бу йыл тизив къыйматлар булан тамамлагъан. Бирикген пачалыкъ экзаменлени инг яхшы къыйматлагъа берип, алтын медальгъа лайыкълы болгъан. Касбу танглайгъанда да ол бек жаваплы янашгъан. Оьзюню гележегин белгилеп, ол Москва шагьардагъы медицина университетлени бирисине охумагъа тюшмеге гьазирлик гёрюп тура. Озокъда, шо заманда яшав сынаву да, англаву да артыкъ ата-анасына, муаллимлеге, береген таклифлеге тынгламай да къоймагъандыр. Тек ол юреги алагъан касбуну танглагъанын ташдырып айта.
Уясында не гёрсе, учгъанда да шону этер дегенлей, яхшы билимлер алмагъа тюшюнгенине огъар, балики, инг алда агьлюде алгъан тарбия таъсир этген болмагъа да ярай. Шугьанэт миналы доргелили Элдар ва Вазипат Алимурзаевлени къызы. Айтагъаным, ону ата-анасы татывлу уьягьлю къуруп яшайгъандан къайры да, оьз заманында оьр билимлеге де ес болгъан, касбусун да гьар къачан да тийишли кюйде юрютген. Чинкдеси, дёрт де авлетине ким де сукъланардай тийишли тарбия берип оьсдюре.
Гьали энни Шугьанэтны уланкъардашына ва къызардашына да ону гьаракаты уьлгю болуп къалажакъ. Шо гьакъда айта туруп, шу ерде Элдар Алимурзаев Дагъыстанда ябушувну бокс журасына къарайгъан федерациясыны ёлбашчысыны къуллугъунда чалышагъанын да айрыча эсгермекни тийишли гёремен.
Н. Б.
