Гетген талатгюн, июль айны тогъузунда, Буйнакск районну башчысы Уллубий Ханмурзаев Украина бойда юрюлеген хас асгер гьаракатда жанларын къурбан этген игит уланланы агьлюлерин ва ювукъ адамларын къабул этди.

Россиягъа янгы къошулгъан областланы миллетчи уьюрлерден эркин этмек учун ябушгъан къоччакъланы ата-аналары, агьлюлери шо ёлугъувну барышында аслу гьалда арагъа чыгъагъан­ яшавлукъ масъалаланы айланасында лакъыр юрютдюлер.

—  Сизин уьстюгюзге тюш­ген авур къайгъыны басылтмакъ, гёнгюгюзню алмакъ, юреклеригизни ачмакъ учун сёзюбюз етишмей. Ана Ватанын якълай туруп, оьзлени инг багьалы ва аявлу жанларын  берген игитлени атларын биз бир заманда да унутмасбыз, эсде сакъларбыз. Сизин авлетлеригиз гёрсетген къоччакълыкъ булан оьк­тем болабыз, шону булан бирге гьар-бир, гиччи болсун, уллу болсун, къуллукъларыгъызгъа табулмагъа да гьазирбиз», — деп башлады игитлени агьлюлери булангъы лакъырын У.Ханмурзаев.

Игитлени агьлюлери гьариси оьзлени яшаву гьакъда, эсде къалар йимик этип хабарладылар, гележекге къурагъан умутларын, хыялларын яшырмай айтдылар ва бир-бир агьамиятлы так­лифлерин арагъа чыгъарма да болушлукъ этдилер.

Шолай  аявлу адамын тас этген гьар агьлюге тийишли болагъан документлени онгарыв гьаракатында чечме бажарылмас йимик гёрюнеген бир-бир четимликлеге къаршы болма, бетге-бет урунма тюше. Шо гьалны енгиллешдирмек муратда тас этивге тарыгъан агьлюлени гьайын этип чалышагъан юристлени бёлюгюн ачмакъ деген сиптебизни якълап иш тутма бажарылса онглу да, онгайлы да болар  эди.

Ондан къайры да асгер гьаракатда яраланып, сакъат болуп къайтгъанлагъа медицина якъдан этилеген тергев де юрек тынышардай гьалында тюгюл. Бир-бир яралылар ятагъан асгер госпиталлар тыгъылып толуп табула. Яраланып медицина къуллукъчуланы кёмегине уьзюрюлени ватандашлар савлугъуна къаратагъан­ оьзге больницаларда ерлешдирме неге ярамай. Яра тийгенлеге оьз заманында тийишли тергев берилип, къуллукълары кютюлсе, оланы аякъгъа турувуна да шайлы кёмек ва енгиллик болар эди.

Ёлугъувну жамын чыгъара туруп, районну­ башчысы ону гьар ортакъчысына разилигин билдирди, гётерилген масъалалагъа бир ягъадан къаралажагъына, оьзюню гючю чатмайгъанларын оьрдеги гьакимлик къурумлагъа етишдирип чечме къаст этежегине инандырды.

Шулай ёлугъувланы барышында арагъа чыгъагъан масъалалар районда гьазиринде чечиле деп айтмагъа болабыз. Хас асгер гьаракатда жан берген Вугар Азаевни агьлюсюню уьйлеринде толу ремонт ишлер этилген. Жан бергенлени эсделигин уьнемлешдирмек муратда да хыйлы ишлер яшавгъа чыгъарылып тура, оланы гьюрметине эсделик белгилер салына, игитлени парталары ачыла. Районлулар гьаракатны ортакъчыларына бир де бошамай сахават кёмегин де болдуралар. Шо агьамиятлы иш, тарыкълы гьаракат энниден сонг да бир де токъталмагъан кюйде юрюлежек.

Казим КЪАГЬРУМАН.

СУРАТДА: ёлугъувну вакътисинде.