Украина бойда хас асгер гьаракат юрюлегени уьчюнчю йылгъа айланды. Шону ортакъчыларына кёмек этив аслу тергевню тюбюнде. «Каспий» деген гёнгюллюлени батальонуна къошулма сюегенлеге этилеген тергев де артгъан.

 Алдындагъы гюнлерде Дагъыстанны Башчысы Сергей Меликов хас асгер гьаракатлагъа барма рази болагъанлагъа бир керен берилеген акъчаны 5 керенге артдырма токъташгъанын билдирди.

«Хас асгер гьаракатгъа барма  токъташгъан ва дыгъар этген адамгъа республикадан 500 минг, федерал бюджетден 195 минг ва шо адам яшайгъан­ гьар шагьардан-райондан 100 минг берилежек», – деп яза ол оьзюню телеграмм каналында.

Демек, гьаракатгъа барма дыгъар этген адам шоссагьат 800 минг манат алма болажакъ. Шондан къайры да гьаракатны ортакъчыларыны айлыгъы 204 минг манат токътай. Шолай да, агьлюлерине енгилликлер де гёрсетилген. Олар яшайгъан ерлерде уьй къурмакъ учун гьавайын топуракъ да гёрсетилежек.

– Хас асгер гьаракатгъа къошулгъанланы гьариси инамлы адам – дей Сергей Меликов. – Ватаныны аманлыгъын сакъламакъ учун жанын-къанын аямай, къолуна савут да алып, элин, агьлюсюн ва яшларын якълайгъан адам – герти патриот, герти игит. Олар яхшыны-яманны эшитип билмей, гёрюп биле. Бизин Башкоман-дующийибиз В.Путин айтагъан кюйде, олагъа не ишни де тапшурма ярай. Шону учун да хас асгер гьаракатдагъыланы арасындан сайлап, гьукуматыбызны ва республикабызны жаваплы ишлерине салмакъ учун тарыкълы билимлер берип, гележекге гьакимлер гьазирлев давам этиле.

Сёз ёругъуна гёре айтсакъ, уьлкеде йылны биринчи 4 айында гёнгюллю кюйде хас асгер гьаракатда ортакъчылыкъ этмек учун 100 минг адам дыгъар язгъан. Россияны Оборона министерлиги билдиреген кюйде, гюнде гёнгюллю кюйде хас асгер гьаракатгъа бармакъ учун 1700 адам арза берелер.

 

Г.БЕК.