Гепатит аврувланы гьакъында биз чакъ-чакъда эсгереген кююбюз бола. Неге тюгюл, шолар къоркъунчлу, намарт аврувлардан гьисапланагъандан къайры да, оьтесиз тез де яйыла.
Алдагъы гюнлерде «Марва-комплексде» юрюлген «Дагъыстанны савлукъ сакълаву» деген 10-нчу юбилей медицина выставкада республиканы инфекция аврувлагъа къарайгъан ва СПИД-ге къаршы иш гёреген центрыны гьаракаты гьакъында айрыча сёз юрюлдю.
Бу центр оьзлени аслу ишинден къайры да, ВИЧ, гепатит, сифилис аврувланы алдын алмакъ муратда да республиканы гьар ерлерине оьзлени лабораториялары булан барып, жамиятны арасында медицина тергевлер оьтгерелер.
Шолайлыкъда бу центр болгъан чакъы кёп адамны къуршап, оланы тийишли кюйде медицина къаравлардан чыгъарып, халкъгъа заманында савлугъуну гьайын этмеге герекни эсине сала. Адамны къаркъарасында яман къоркъунчлу аврувланы янгы билинме турагъан вакътисинде ачыкъ этмекни бек агьамияты барны англата. Шо заман аврувгъа санлы дарман этип, ону багъып, адамны савлугъун сакъламагъа бажарыла.
Выставка юрюлген эки гюнню ичинде ВИЧ-ге, гепатит В ва С-ге, сифилисге 200-ден де артыкъ адам тест этген. Оланы арасында 8 адамда гепатит С, 6 адамда буса гепатит В вируслар табылгъан.
– Биз гьар йыл медицина тергевлени дазуларын генглешдиребиз. Бизин касбучуларыбыз шо югъагъан намарт аврувлар болмагъа имканлыланы айрокъда чакъ-чакъда тергейлер. Неге тюгюл, гепатит В-ни ва С-ни янгы билинип гелеген вакътисинде тутмагъа болса, шо адамлар яман аврувланы къармагъындан къутулгъангъа гьисаплы демеге ярай. Гепатит аврувлар бек яйылып гетегенни бары халкъ билмей. Ондан къайры да, къаркъарасына шо вирус къатнагъанлар оьзлени савлугъуна къоркъунчлукъ тувулунгъанына бир де шекленмей турмагъа болалар, билмей де къалалар. Гепатит С аврувну гьалиги къайдалы терапия булан республика инфекция аврувлагъа къарайгъан ва СПИД-ге къаршы иш гёреген центрда сав этмеге бажарыла. Шолай да, гепатит В вирусну гючюн осаллашдырмагъа да бола. Шо да адамны бавурун цирроз аврувдан сакъламагъа кёмек эте,–деп билдирди республиканы инфекция аврувлагъа къарайгъан ва СПИД-ге къаршы иш гёреген центрыны баш врачы Равгьаният Мирзаева.
Дагъыстанны савлукъ сакълав министрини биринчи заместители Ярослав Глазов да оьзгелеге де уьлгю гьисапда выставкада югъагъан аврувланы алдын алмакъ учун оьтгерилген тергевлерден чыкъды.
П. ГЬАЙБУЛЛАЕВА.
