Паластинаны ва Исрайылны арасында дав башлангъанда ондан  хыйлы агьлюлер бизге  къачып гелип, республикабызны гьар ерлеринде сыйынгъанлар. Олагъа онгайлы шартлар да яратылгъан, кёплери ишлеге де къуршалгъанлар, шолай да оланы тарыкъ-герек  яшав  къуллукълары да кютюле.

Алдагъы гюнлер  Х.О. Булачны атындагъы республиканы офтальмология  больницасына  Сектор Газадан  гелген палас­тинли Сакер Самир Мохамет   гёрегени осаллашгъан деп шондагъы касбучулагъа гёзлерин гёрсетмеге баргъан. Олар ону  савлугъун гьар-бир якъдан  тергеп чыкъгъан сонг Сакир Самир Мохаметни катарактасы барны токъташдыргъанлар.

Шо катаракта огъар оьр даражалы миопиядан ва шекер аврувдан болгъаны  ачыкъ этилинген. Гёзюню бебейи тусгъунай тюсге гирип,  гёзюню  гёрегени 10 процентге тёбен тюшген. Огъар­ тезликде операция этмесе бажарылмайгъанны билген сонг, шо больницада чалышагъан­ врач-офтальмохирург Магьаммат Гьамзалов катарактасын тайдырып, огъар хрусталик салгъан. Уьстюнлю кюйде оьтгерилген операциядан сонг Паластинаны ватандашы 70 процентге гёреген болгъан. Гьали энни ону 2-нчи гёзюне де операция этмеге тюше.

Бугюнлерде Сакер Самир Мохамет оьзюню гьалы яхшы деп эсгере  ва дюньяны ярыгъын гёрмеге кёмек этген врачлагъа, медицина къуллукъчулагъа баракалласын билдире. Энниден сонг ол Дагъыс­танда къалмагъа да умут эте. Ол айтгъан кюйде, Дагъыстанда турагъан вакътини ичинде ол рес­публиканы халкъын, рагьмулу адамларын гьакъ юрекден сюйген ва олагъа исинген.

– Паластинаны халкъына бизин янашывубуз айрыча башгъа. Неге тюгюл, олар кёп уллу балагьлагъа тарыды, къыйынлыкълагъа тюшдю. Олар бизин якълавубузгъа, кёмегибизге харлы болгъанлар, – деп белгиледи Х. О. Булачны атындагъы республика офтальмология больницаны баш врачы Элмира Омарова. – Сакер Самир Мохамет оьзю де врач. Бугюн биз огъар кёмек этген бусакъ, тангала-бирисигюн о да бизин ватандашларыбызны  врач гьисапда аврувларын багъып, оланы да савлугъун беклешдирме кёмек къолун ялгъар», – деп тамамлады сёзюн баш врач.

Катаракта–инг де бек яйылгъан,  гёзню гёреген даражасын тёбенлешдиреген аврувланы бири. Гёзлеринден къыйыны барланы хрусталиги тунукълашагъандан  къайры да, тийишли дарманларын этмесе, заманында тергетмесе гёрмейген болуп къала.  55-ден тутуп 60-йылгъа ерли  чагъындагъыланы 70 процентини катарактасы бола. 80 йылдан артгъан  сонг гьар адамда шо аврув болагъаны мекенли. Шо саялы  офтальмологлар къоркъунчлу  аврувланы алдын алмакъ учун заманында медицина къаравлардан оьтюп,  гёзлеригизни гьалына агьамият берип, тийишли къайдада дарманлар  этмеге чакъыра.  

П. ГЬАЙБУЛЛАЕВА.