МВД-ни Бабаюртдагъы бёлюгюню къуллукъчусу Шагьман Гьасанов Терик оьзенде сувгъа батып барагъан эки адамны оьлюмден къутгъаргъан. Ону тергевлю янашып гёрсетген къоччакълыгъы ва тавакаллыгъы саялы, Россияны МВД-сини министри Владимир Колокольцев, Россияны Президенти Владимир Путинге о гьакъда язып, ону «Сувда батылгъанланы къутгъаргъаны учун» деген медаль булан савгъатламакъны гьакъында гьаракат этген.
Ш. Гьасанов оьзюню ишден бош вакътисинде уьягьлюсю булан Терик оьзенни ягъасында ял алма бара. Бир вакътиде ол кёмекге чакъырагъан тавушланы эшите ва къайдан гелегенге яхшы тынглай. Тавушлар сувну ичинден гелегенни англагъан сонг, гьеч ойлашмай иш гёре. Оьзенде чагъына етишмеген яш батыла бара, ону къутгъармагъа тюшген эргишини де гючю чатмай табула. Тез етишип гелген полицияны къуллукъчусу башлап оьрюм яшны, сонг эргишини сувдан чыгъара ва биринчи кёмегин эте.
Арадан заман гетип белгили болгъаны йимик, олар спортну регби журасыны тренери ва ону тарбиялавчусу болгъанлар. Яш уланлар тренеринден ихтиярсыз киринме тюшелер, шо вакътиде оланы бириси сувда батыла барагъаны гёрюне. Тренер кёмекге баргъанда, оьзю де яш булан бирге сувда батма башлагъан.
«Адамны яшавуна къоркъунчлукъ тувулунгъан вакътиде — бары затдан алда, кёмек этмеге алгъасама герек. Савгъатны, баракалланы гьакъында ой гелмей. Адамны оьлюмден къутгъарып кёмек этмекден яхшы даража ёкъдур. Мени еримде башгъа адам болгъан буса да, шолай этер эди деп ойлайман», — дей. Ш. Гьасанов.
Герейхан ГЬАЖИЕВ,
бизин мухбирибиз.
СУРАТДА: Шагьман ГЬАСАНОВ
