Уллу Ватан давну ортакъчысы Ниъматулла Исаев 1924-нчю йылда Яхсайда тувгъан. Юртда ажамча охуп 4 класны битдирген, сонг совет школада охугъан. 1938-нчи йылда атасы булан Чагъаротарны тюп боюндагъы мамукъ оьсдюреген совхозда ишлеген.
1941-нчи йылда совхоздагъы 27 жагьил яш фронтгъа барма арза яза. Бу яшланы фронтгъа 1943-нчю йылда ала ва Моздок бойгъа йибере. Аслу гьалда жагьиллеге артгъа тартылагъанда яшынып къалгъан немислени тутмакъ борч салына. Моздокдан таба юртланы немислерден тазалай туруп, Орджоникидзе шагьаргъа ерли геле. Башгъа асгерлер де булан Ниъматулла къуллукъ этеген бёлюк 1000 немисни тута. Оланы Магьачкъаладагъы туснакъгъа гелтире ва заводларда ишлете.
Шолай, Ниъматулла НКВД-ни гьисабына алынып, туснакъларда дезертирлени излеп, 1951-нчи йыл болгъанча ишлей.
Шондан сонггъу йылларда «Дагнефть» къурумда ишлей, сонг 20 йыллар молланы борчларын юрюте. 1994-нчю йылда гьажгъа бара ва оьзюню бусурманлыкъ борчун толу кюте. Гьали авлетлиринден, оланы да авлетлеринден сююнюп яшай.
1-нчи июльда гьюрметли тамазабызгъа 100 йыл таманланды. Шо байрамы булан ону Россияны Президенти В.Путин де къутлады. Шо къутлавлагъа биз де къошулабыз ва тамазабызгъа савлукъ ёрайбыз!
