Екатеринбург шагьарда 14-нчю гезик оьтгерилеген Халкъара промышленный выставканы ишинде Дагъыстан да ортакъчылыкъ эте. Бирлешген Арап Эмиратларындан гелип де выставкада 40 компания ортакъчылыкъ эте. Китайны, Венгрияны, Тюркияны да къошуп выставкада 11 пачалыкъны вакиллери бар.
Дагъыстандан баргъан делегацияны башчысы, республиканы промышленност ва сатыв-алыв министри Низам Халилов ва Свердловск областдагъы Дагъыстанны вакили Гьажи Абдулкаримов выставканы ишинде актив кюйде ортакъчылыкъ этелер.
«Уралны тахшагьары–Екатеринбург халкъара выставкаланы оьтгеривде аслу ерни тута ва гьазирлиги бар. Дагъыстан булай выставкаланы къутгъармай. Арап Эмиратлар булан бирче иш гёрювню семинарлары оьтгериле, сынав алышдырыла, эки де якъгъа пайдалы болагъан кюйде иш юрюле. Шо да Дагъыстанны промышленностуну оьсювюне болушлукъ эте. Урал буса машинлер чыгъарагъан тармагъы булан бизин республикагъа айрокъда пайдалы.
Олай да, Свердловск областны промышленност ва илму министри Сергей Пересторонин булан болгъан ёлугъувубуз бек пайдалы оьтдю. Бизин республиканы ва Свердловск областны арасында байлавлукъланы уьзмей, сатыв-алыв аралыкъланы сыкълашдырыв учун дыгъарлагъа къоллар салынды», — деп баянлыкъ берген Н.Халилов.
Я.БИЙБОЛАТОВ.
