Оьтген гюнлерде районубузгъа гелген къайгъылы хабар адамланы юреклеринде пашманлыкъ тувдурду. Украина бойда юрюлюп турагъан хас асгер чарада, ону ортакъчысы бабаюртлу Уллубий Салимовну жаны къыйылды.
Ватанны алдындагъы борчун кюте туруп къоччакъ кюйде жан берген Уллубий Салимовну анасына ва дос-къардашына теренден къайгъырышывун билдире туруп, Бабаюрт районну башчысы Даниял Исламов Уллубий Салимовну жаны Ватаныбыз учун къурбан болмакълыгъы савлай районну халкъы учун авур къайгъы болуп токътагъанны эсгерди.
Къоччакъны гьюрметли анасы – Аминат Хасмурзаевна, ону ювукъ адамлары! Биз сизин булан бирге къайгъырабыз. Уллубий оьзюн Ватанны герти патриоту гьисапда гёрсетме бажарды. Россия Федерацияны бирлигин якълай туруп, парахатлыкъны болдурувда ол оьзюню лап да аявлу яшавун берди. Сизге Аллагь маслагьатлыгъын салсын, сабурлукъ берсин! Уллубий халкъны эсинде даимге Ватаныбызны герти якълавчусу гьисапда оьсюп гелеген яш наслугъа уьлгю болуп токътажакъгъа шеклик ёкъ, – деди ол, Уллубийни анасы Аминат Хасмурзаевнагъа къайгъырышывун билдире туруп.
48 йыллыкъ Уллубий Салимов 2023-нчю йылны сентябр айында Россия Федерацияны Оборона министрлиги булан дыгъар байлап, хас асгер гьаракатгъа гетген эди. Асгерде къуллукъ этеген вакътини ичинде ол Ватаныбызны герти патриоту гьисапда ахыр тынышына ерли асгер борчун оьр даражада кютдю.
2024-нчю йылны февраль айында, берилген тапшурувун кютеген вакътиде Уллубий авур яралана. Амма къолай болгъан сонг, дагъыда къайтып оьзюню асгер ёлдашларыны янына бара.
Гёрсетген бажарывлугъу ва тапшурувланы уьстюнлю кютегени саялы бу йылны май айында «Къоччакълыгъы учун» деген медаль булан да савгъатлангъан.
Ахырынчы тапшурувуна Уллубий ёлдашлары да булан 2024-нчю йыл июн айны 8-нде гете. Олар Донецк Республикасыны Ясиноватский районуну Невельское деген юртунда гючлю урушлагъа къаршы бола. Шо вакътиде Уллубийге яшаву булан къыйышмайгъан кюйдеги авур яра тие..
Хас чарада гёрсетген игитлиги учун У. Салимов оьлген сонг, Къоччакълыкъны орденине гёрсетилген.
Уллубий абурсый ва кёп адамны ортакъчылыгъы да булан ата юрту Бабаюртда гёмюлдю.
Герейхан ГЬАЖИЕВ,
оьз мухбирибиз.
